پنجاب پروٹیکشن اونرشپ ایکٹ 2025 کیخلاف آئینی درخواست متعلقہ بینچ کے روبرو لگانے کی ہدایت

لاہور ہائی کورٹ نے پنجاب پروٹیکشن اونرشپ ایکٹ 2025 کے خلاف آئینی درخواست چھٹیوں کے بعد متعلقہ بینچ کے روبرو لگانے کی ہدایت کر دی۔لاہور ہائی کورٹ کے جسٹس فیصل زمان خان نے پی ٹی آئی کے 2 ایم پی ایز کی درخواست پر سماعت کی۔دوران سماعت عدالت کی جانب سے کہا گیا کہ اظہر صدیق صاحب کیا اس معاملے کو سیاسی کرنا ضروری ہے؟ اتنی ٹرولنگ کے باوجود عدالت نے اس معاملے کو اٹھایا، آپ نے دو پی ٹی آئی کے ایم پی ایز کو لے کر درخواست دائر کی، کیا ان ایم پی ایز نے اسمبلی میں اس ایکٹ کے خلاف تقریر کی۔عدالت نے کہا کہ یہ اسمبلی میں تو بولے نہیں یہاں درخواست دائر کر دی، آپ نے اپنی پیٹیشن فیس بک پر لگا دی ہے، اس معاملے کو سیاست زدہ نہ کریں، یہ معاملہ غریب شہریوں کی جائیدادوں کا ہے۔لاہور ہائی کورٹ نے اظہر صدیق سے سوال کیا کہ آپ اس درخواست کے ذریعے حکومت کو فائدہ دے رہے ہیں۔ آپ کو اپنی درخواست واپس لینا چاہیے، آپ کسی متاثرہ شخص کی جانب سے درخواست دائر کرتے تو سمجھ آتی، آپ کی اس درخواست پر بہت افسوس ہوا۔درخواست میں مؤقف اپنایا گیا کہ ایکٹ کے تحت جائیداد سے متعلق اختیارات انتظامیہ کو دے کر آئین کی خلاف ورزی کی گئی، ڈسپیوٹ ریزولیشن کمیٹی میں فریقین کو وکیل کے ذریعے پیش ہونے کی اجازت نہیں، سول عدالتوں کا دائرہ اختیار ختم کرنا آئین سے متصادم ہے، ایگزیکٹو اور عدالتی اختیارات کو یکجا کرنا عدلیہ کی آزادی پر حملہ ہے۔درخواست میں استدعا کی گئی ہے کہ پراپرٹی اونرشپ ایکٹ اور اس کے تحت ہونے والے اقدامات کالعدم قرار دیے جائیں