عالمی مالیاتی منڈیوں میں شدید مندی کی لہر دوڑ گئی، امریکی اسٹاک مارکیٹ، کرپٹو کرنسیز اور سونے کی قیمتوں میں نمایاں کمی نے سرمایہ کاروں کو تشویش میں مبتلا کردیا۔ امریکی ٹیکنالوجی اسٹاکس پر مشتمل نیس ڈیک انڈیکس ایک ہفتے کے دوران تقریباً 10 فیصد گرگیا، بٹ کوائن کی قیمت 60 ہزار ڈالر کی نفسیاتی حد سے نیچے آگئی، جبکہ سونے کی قیمت میں بھی ہفتہ وار بنیادوں پر 9 فیصد سے زائد کمی ریکارڈ کی گئی۔
رپورٹس کے مطابق امریکی اسٹاک مارکیٹ میں فروخت کے شدید دباؤ کے باعث نیس ڈیک انڈیکس جمعے کے روز 5.28 فیصد نیچے آگیا۔ ایک ہفتے کے دوران تقریباً 10 فیصد کمی کے ساتھ یہ مارچ 2020 میں کورونا وبا کے ابتدائی دنوں کے بعد انڈیکس کی سب سے بڑی ہفتہ وار گراوٹ قرار دی جارہی ہے۔
صرف امریکی اسٹاک مارکیٹ ہی نہیں بلکہ ڈیجیٹل کرنسیوں کی عالمی منڈی بھی شدید دباؤ کا شکار ہے۔ دنیا کی سب سے بڑی کرپٹو کرنسی بٹ کوائن ایک ہفتے کے دوران تقریباً 13.2 فیصد قدر کھو بیٹھی اور اس کی قیمت 60 ہزار ڈالر کی اہم نفسیاتی سطح سے نیچے چلی گئی۔ اسی طرح سونے کی قیمت میں بھی تقریباً 9.2 فیصد ہفتہ وار کمی ریکارڈ کی گئی، جس سے عالمی سرمایہ کاروں میں بے یقینی مزید بڑھ گئی۔
مالیاتی ماہرین کے مطابق عالمی منڈیوں میں حالیہ مندی کی اہم وجوہات میں مصنوعی ذہانت (اے آئی) کے شعبے میں ہونے والی بھاری سرمایہ کاری پر بڑھتے ہوئے خدشات شامل ہیں۔
امریکا کی بڑی ٹیکنالوجی کمپنیاں مصنوعی ذہانت کے نظام، ڈیٹا سینٹرز، جدید کمپیوٹر چپس اور متعلقہ انفرااسٹرکچر کی تیاری پر اربوں ڈالر خرچ کررہی ہیں۔ تاہم سرمایہ کاروں کے ذہنوں میں یہ سوال شدت اختیار کررہا ہے کہ آیا ان بھاری اخراجات کے مقابلے میں مستقبل میں اتنا منافع حاصل ہوسکے گا جو ان سرمایہ کاریوں کو جائز ثابت کرسکے۔
سرمایہ کاروں کو خدشہ ہے کہ اگر اے آئی ٹیکنالوجی سے متوقع آمدنی اور منافع حاصل نہ ہوا تو ٹیکنالوجی کمپنیوں کی موجودہ بلند مالیت میں نمایاں کمی آسکتی ہے۔ یہی خدشات ٹیکنالوجی اسٹاکس میں بڑے پیمانے پر فروخت کا سبب بن رہے ہیں
دوسری جانب مصنوعی ذہانت کے شعبے سے وابستہ کمپنی اینتھروپک کی اسٹاک مارکیٹ میں آمد بھی سرمایہ کاروں کے اعتماد کو مکمل طور پر بحال نہ کرسکی۔
دستیاب اطلاعات کے مطابق کمپنی کے حصص نے پہلے روز اپنی ابتدائی پیشکش کی قیمت 83 ڈالر کے مقابلے میں 17.1 فیصد اضافے پر کاروبار کا اختتام کیا، تاہم دوسرے روز حصص کی قیمت میں نمایاں گراوٹ دیکھنے میں آئی۔ اس صورتحال نے اے آئی کمپنیوں کی قدر اور ان کے مستقبل کے منافع سے متعلق سرمایہ کاروں کے خدشات کو مزید نمایاں کردیا۔
عالمی مالیاتی منڈیوں میں مندی کی ایک اور اہم وجہ امریکا میں شرح سود اور مہنگائی سے متعلق غیر یقینی صورتحال ہے۔ سرمایہ کاروں کو خدشہ ہے کہ مہنگائی پر قابو پانے کے لیے امریکی مالیاتی پالیسی سخت رہ سکتی ہے، جس کے نتیجے میں قرضوں کی لاگت بلند اور کاروباری سرمایہ کاری متاثر ہوسکتی ہے۔
شرح سود میں اضافے یا طویل عرصے تک بلند سطح برقرار رہنے کے خدشات کے باعث سرمایہ کار زیادہ خطرے والے اثاثوں، خصوصاً ٹیکنالوجی اسٹاکس اور کرپٹو کرنسیز سے سرمایہ نکالنے کو ترجیح دے رہے ہیں۔
مالیاتی منڈیوں میں حالیہ صورتحال نے عالمی معیشت اور ٹیکنالوجی کے مستقبل سے متعلق ایک اہم بحث کو جنم دے دیا ہے کہ مصنوعی ذہانت کے شعبے میں اربوں اور کھربوں ڈالر کی سرمایہ کاری سے حقیقی منافع کب حاصل ہوگا اور اس کا حجم کتنا ہوگا؟
ماہرین کے مطابق اگر اے آئی ٹیکنالوجی سے متوقع معاشی فوائد حاصل نہ ہوئے تو ٹیکنالوجی کمپنیوں کی مالیت اور عالمی اسٹاک مارکیٹوں پر دباؤ برقرار رہ سکتا ہے۔ تاہم اگر یہ سرمایہ کاری مستقبل میں نمایاں پیداواری بہتری اور آمدنی میں اضافے کا باعث بنتی ہے تو موجودہ خدشات عارضی بھی ثابت ہوسکتے ہیں۔
فی الحال وال اسٹریٹ سے لے کر کرپٹو کرنسی مارکیٹ تک سرمایہ کار غیر یقینی صورتحال سے دوچار ہیں، جبکہ سونے جیسی روایتی سرمایہ کاری میں بھی نمایاں گراوٹ نے عالمی مالیاتی منڈیوں کی موجودہ صورتحال کو مزید غیر معمولی بنا دیا ہے۔