پی ٹی آئی ممبران فون کرکےاستعفےقبول نہ کرنےکاکہتے ہیں،اسپیکر اسمبلی کاانکشاف

اسپیکر قومی اسمبلی اور سابق وزیر اعظم راجہ پرویز اشرف نے انکشاف کیا ہے کہ پاکستان تحریک انصاف (پی ٹی آئی) کے ارکان قومی اسمبلی فون کرکے استعفے قبول نہ کرنے کا کہتے ہیں۔ لاہور میں میڈیا سے گفتگو میں راجہ پرویز اشرف کا کہنا تھاکہ پاکستان کے تمام چیلنجز پر قابوپانےکا فورم صرف پارلیمان ہے، تمام سیاسی جماعتوں کو معیشت کو سہارا دینے کیلئے حصہ لیناہوگا، ہمیں قانون سازی کرنا اور قانون کی عملداری قائم کرنی ہے۔انہوں نے کہا کہ استعفے منظور کرنے کے قواعد و ضوابط ہیں، اگرکوئی آکر استعفے کا بیان دے اور مجھے علم ہوکہ اس پر دباؤ ہے تو میں استعفیٰ قبول نہیں کرونگا، جب تک میری تسلی نہ ہو، میں استعفیٰ قبول نہیں کروں گا۔اسپیکر نے انکشاف کیا کہ ابھی تک پی ٹی آئی والے لاجز میں بیٹھے ہیں، مراعات لے رہے ہیں، یہ پیغام بھیجتے ہیں، فون کرتے ہیں کہ ہمارا استعفیٰ قبول نہ کریں۔ان کا کہنا تھاکہ اسمبلی مدت پوری کرتی ہے تو نظام مضبوط ہوگا، وقت ہی کیا رہ گیا ہے؟ ویسے ہی الیکشن کاسال ہے، پانچواں سال شروع ہے، بطور اسپیکر میری خواہش ہوگی ہر اسمبلی مدت پوری کرے گی.