پاک بحریہ، پی ایم ایس اے اور کسٹمز کا مشترکہ آپریشن، بھاری مقدار میں شراب ضبط

پاک بحریہ نے قانون نافذ کرنے والے اداروں کے ساتھ مل کر مشترکہ آپریشن کے دوران 145.6 ملین روپے مالیت کی شراب ضبط کر لی۔پاک بحریہ، پاکستان میری ٹائم سیکیورٹی ایجنسی اور پاکستان کسٹمز انٹیلی جنس نے شمالی بحیرہ عرب میں جوائنٹ میری ٹائم انفارمیشن اینڈ کوآرڈینیشن سینٹر کے تعاون سے مشترکہ انٹیلی جنس بیسڈ آپریشن کیا جس میں شراب کی 4104 بوتلیں برآمد کی گئیں۔ ضبط شدہ شراب کی مالیت تقریباً 145.6 ملین روپے ہے۔ ضبط شدہ اشیاء کو مزید قانونی کارروائی کیلئے پاکستان کسٹمز کے حوالے کر دیا گیا۔ڈائریکٹر جنرل پبلک ریلیشنز (نیوی) کے مطابق موجودہ سیکیورٹی صورتحال کے تناظر میں جہاں جرائم پیشہ افراد اپنے مذموم عزائم کے سبب پاکستان کو بدنام کرنے میں مصروف عمل ہیں، وہاں پاک بحریہ، پی ایم ایس اے اور پاکستان کسٹمز کا کامیاب مشترکہ آپریشن اس عزم کا اعادہ ہے کہ ملکی بحری اور زمینی سرحدوں کے تحفظ کو یقینی بنانے کے لیے ہماری افواج ہمہ وقت تیار ہیں۔ڈائریکٹر جنرل پبلک ریلیشنز (نیوی) کے مطابق پاک بحریہ اور پی ایم ایس اے سمندر میں نظم و نسق قائم کرنے کے لئے اپنی قومی ذمہ داریوں اور فرائض کو نبھاتے رہیں گے