یو اے ای کا شہریوں سے انفرادی انکم ٹیکس نہ لینے کا اعلان

سعودی عرب کے بعد متحدہ عرب امارات نے بھی اعلان کیا ہے کہ وہ انفرادی سطح پر انکم ٹیکس متعارف کرانے کا ارادہ نہیں رکھتا۔ یو اے ای کے نائب وزیر خزانہ یونس الخوری کے مطابق سعودی عرب کی طرح یو اے ای میں بھی لوگ انکم ٹیکس نیٹ سے باہر رہیں گے۔یونس الخوری نے یہ وضاحت عرب مانیٹری فنڈ کے تحت وزرائے خزانہ کے ایک اجلاس میں کی۔ یہ اجلاس عرب دنیا میں زری پالیسیوں کا جائزہ لینے اور صحتِ عامہ و ماحول کے حوالے سے بجٹ میں فنڈنگ کے متاثر ہونے کے امکان پر بحث اور مشاورت کے لیے بلایا گیا تھا۔کچھ دن قبل سعودی عرب کے وزیر خزانہ محمد الجدان نے اعلان کیا تھا کہ سعودی عرب ملک کے کسی بھی فرد پر انکم ٹیکس عائد کرنے کا ارادہ نہیں رکھتا۔بلوم برگ ڈاٹ کام کو ایک انٹرویو میں محمد الجدان نے کہا تھا کہ سعودی عرب ویلیو ایڈیڈ ٹیکس اور بڑے ملکی و غیر ملکی اداروں سے انکم ٹیکس وصول کرنے کے علاقہ لوگوں سے زکوٰۃ بھی وصول کرتی ہے۔ ایسے میں آمدنی کے مزید ذرائع کی فوری ضرورت نہیں۔