عمران خان کا لانگ مارچ، وزارت داخلہ نے سپریم کورٹ سے رجوع کرلیا

وزارت داخلہ نے احتجاج اور لانگ مارچ کے معاملے پرعمران خان کے خلاف توہین عدالت کی درخواست دائر کی ہے۔

سپریم کورٹ میں دائر درخواست میں وفاقی حکومت نے مؤقف اختیار کیا ہے کہ عمران خان اسلام آباد کی جانب لانگ مارچ اور احتجاج کے اعلانات کر رہے ہیں، عمران خان سپریم کورٹ احکامات کی خلاف ورزی کر رہے ہیں۔درخواست میں کہا گیا ہے کہ سپریم کورٹ نے عمران خان کو پر امن احتجاج کی اجازت دی تھی لیکن عمران خان ایک مرتبہ پھر اسلام آباد پر چڑھائی کے اعلانات کر رہے ہیں۔ دائر درخواست میں استدعا کی گئی ہے کہ سپریم کورٹ عمران خان کو احتجاج اور دھرنے کے حوالے اپنے احکامات پر عملدرآمد یقینی بنانے کا حکم دے

واضح رہے کہ تحریک انصاف کے چیئرمین عمران خان نے اسلام آباد کی جانب لانگ مارچ کی تاریخ کا تاحال اعلان نہیں کیا۔آج بھی راولپنڈی کی پیر مہر علی شاہ یونیورسٹی میں خطاب کے دوران عمران خان کا کہنا تھا کہ بہت جلد کال دینے والا ہوں، جیل تو کیا موت سے بھی نہیں ڈرتا، چوروں اور مافیا کے خلاف آخری وقت تک لڑوں گا۔ میں جیل سے ڈرنے والا نہیں.