برازیل:سابق صدر کےحامیوں کاپارلیمنٹ، سپریم کورٹ پردھاوا،توڑ پھوڑ،فسادات پھوٹ پڑے

برازیل کے سابق صدر جائیر بولسونارو کے ہزاروں حامیوں نے سرکاری عمارتوں پر حملہ کرکے ان میں توڑپھوڑ کی۔ اس موقع پر سیکیورٹی فورسز اور مظاہرین کے درمیان شدید جھڑپیں ہوئیں، جس کے دوران شدید شیلنگ کی گئی۔سیکیورٹی فورسز کئی گھنٹوں کی جدوجہد کے بعد تینوں عمارتوں سے مظاہرین کا قبضہ چھڑانے میں کامیاب ہوگئی ہیں جبکہ پولیس نے سیکڑوں افراد کو حراست میں لے لیا ۔صدر لولا ڈی سلوا نے اسے جنونی لوگوں کی واردات قرار دیتے ہوئے ملوث افراد کو قرار واقعی سزا دینے کا اعلان کیا اور دارالحکومت میں فوج تعینات کردی۔ادھر بیرون ملک موجود سابق صدر جائیر بولسونارو نے واقعے کی حمایت کرنے کی بجائے سختی سے مذمت کرتے ہوئے مظاہرین کو پارلیمنٹ پر حملے کے لیے اکسانے کے الزامات کی تردید کی ہے۔رازیل میں اکتوبر 2022 میں ہونے والے صدارتی انتخابات میں جائیر بولسونارو کو شکست ہوگئی تھی جس پر وہ انتخابی نتائج کو مسترد کرکے بیرون ملک چلے گئے تھے۔ انہوں نے الیکشن میں دھاندلی کا الزام عائد کیا ہے۔امریکا ، فرانس اور اقوام متحدہ نے اس واقعے کی مذمت کرتے ہوئے جمہوری اداروں پر حملے کو ناقابل قبول قرار دیا۔واضح رہے کہ لولا ڈی سلوا کو کرپشن کے کیسز میں نااہلی اور قید کی سزا ہوئی تھی تاہم ان کے تمام الزامات منسوخ کرکے انہیں 2022 کے الیکشن میں حصہ لینے کی اجازت دی گئی جس میں انہوں نے بہت معمول فرق سے کامیابی حاصل کی تھی