معرکہ حق کی پہلی سالگرہ پر فیلڈ مارشل عاصم منیر کی افواجِ پاکستان اور قوم کو مبارکباد

معرکہ حق کی کامیابی کے پہلے سال کے موقع پر آرمی چیف اینڈ چیف آف ڈیفنس فورسز فیلڈ مارشل سید عاصم منیر نے قوم اور افواجِ پاکستان کو مبارکباد دی۔آئی ایس پی آر کے مطابق سربراہ پاک بحریہ اور سربراہ پاک فضائیہ نے بھی قوم اور افواج کو مبارکباد پیش کی۔ترجمان پاک افواج نے کہا کہ قومی یکجہتی کے ساتھ منایا جانے والا یہ دن پیشہ ورانہ مہارت، ہمت اور اتحاد کا ثبوت ہے۔آئی ایس پی آر نے مزید کہا کہ مسلح افواج ہمیشہ پاکستانی عوام کے شانہ بشانہ ہیں اور قوم سے لازوال رشتے کو جذبہ خدمت کے ساتھ فخر سے نبھا رہی ہیں۔ معرکہ حق قوم کی تاریخ میں ایک اہم سنگ میل بن گیا ہے، جو قومی عزم، عسکری مہارت اور حکمت عملی کی پختگی کی عکاسی کرتا ہےترجمان کے مطابق معرکہ حق کی کامیابی نے قومی اعتماد کو مضبوط کیا اور پاکستان کو ایک ذمہ دار اور مستحکم علاقائی قوت کے طور پر اُجاگر کیا۔ اس کامیابی نے یہ بھی واضح کیا کہ پاکستان مؤثر دفاعی صلاحیتوں کا حامل ہے۔آئی ایس پی آر نے کہا کہ معرکہ حق کے دوران پاکستان کے مؤثر ردِعمل نے دشمن کی سازشوں کو بےنقاب کیا اور دشمن کے فالس فلیگ کے جھوٹے بیانیے اور پروپیگنڈے کو آشکار کیا۔ اس دوران دشمن کو عالمی سطح پر رسوائی بھی اٹھانا پڑی۔ترجمان نے مزید کہا کہ پراکسی دہشت گردی سمیت روایتی اور ہائبرڈ چیلنجز کا سامنا کرنے کے باوجود مسلح افواج نے اعلیٰ صلاحیتوں کا مظاہرہ کیا۔ افواج نے زمینی، فضائی، بحری، سائبر اور معلوماتی ڈومینز میں اعلیٰ آپریشنل صلاحیت دکھائی۔آئی ایس پی آر کے مطابق معرکہ حق کے بعد پاکستان نے اپنی دفاعی صلاحیتوں میں مزید اضافہ کرتے ہوئے مکمل سپیکٹرم ڈیٹرنس کو تقویت دی ہے