ممکنہ تحریک عدم اعتماد: صادق سنجرانی متحرک ہو گئے،سیاسی جماعتوں سےرابطے

تحریک انصاف کی جانب سے ممکنہ طور پر چئیرمین سینیٹ کے خلاف لائی جانے والی تحریک عدم اعتماد سے بچنے کیلئے صادق سنجرانی نے مختلف سیاسی جماعتوں سے رابطے شروع کر دیئے۔ چیئرمین سینیٹ صادق سنجرانی نے متوقع تحریک عدم اعتماد کی ناکامی کیلئے پیپلزپارٹی، جے یو آئی اور بی این پی مینگل سے رابطے کئے اور تعاون کی درخواست کی۔ جے یو آئی ف اور بی این پی مینگل نے صادق سنجرانی کو فوری طور پر کوئی جواب نہیں دیا صادق سنجرانی نے باہمی دوستوں کے زریعے پیپلزپارٹی قیادت کو مفاہمت کے پیغامات بھجوائے ہیں تاہم پی پی قیادت نے صادق سنجرانی کے پیغامات کا کوئی جواب نہیں دیا۔ صادق سنجرانی جلد خیبرپختونخوا اور بلوچستان کی دیگر جماعتوں سے رابطے کر کے تعاون کی درخواست کریں گے جبکہ جے یو آئی اور بی این پی مینگل نے صادق سنجرانی سے پارٹی سطح پر مشاورت کیلئے مہلت مانگی ہے۔