راولپنڈی سے اغواء اسسٹنٹ ڈائریکٹر ایف بی آر کی لاش برآمد، ملزمان گرفتار

راولپنڈی تھانہ آر اے بازار کی حدود سے اغواء ہونے والے فیڈرل بورڈ آف ریونیو (ایف بی آر) کے اسسٹنٹ ڈائریکٹر کی 10 روز بعد لاش برآمد ہوئی ہے جبکہ پولیس نے واردات میں ملوث ملزمان کو بھی گرفتار کرلیا۔لواحقین کے مطابق مغوی اسسٹنٹ ڈائریکٹر ایف بی آر کی لاش سرائے خربوزہ سے برآمد کی گئی، مقتول رحمت اللہ کی لاش 10 روز بعد برآمد کی گئی۔پولیس کے مطابق ملزمان نے اسٹنٹ ڈائریکٹر ایف بی آر کو قتل کرکے لاش سرائے خربوزہ میں دفن کردی تھی، مقتول رحمت اللّٰہ خان کو تھانہ آر اے بازار کے علاقے کمال آباد سے اغواء کیا گیا تھا۔پولیس کا کہنا ہے کہ رحمت اللّٰہ خان عید کے تیسرے روز دوستوں سے ملنے نکلا تھا، واپس گھر نہیں لوٹا، اغواء کاروں نے سرکاری افسر کی رہائی کےلیے بھاری تاوان کا مطالبہ کیا تھا، رحمت اللّٰہ خان کے اغواء کا مقدمہ 12 اپریل کو درج کیا گیا تھا۔پولیس نے بتایا کہ سرکاری افسر کے اغواء اور قتل میں ملوث چاروں ملزمان کو گرفتار کرلیا گیا ہے، ملزمان سے اسلحہ اور واردات میں استعمال ہونے والی گاڑی بھی برآمد کی گئی ہے۔ملزمان کی شناخت وحید گل، صادق، محمد بہادر اور عبداللّٰہ کے نام سے ہوئی ہے، ملزمان کی نشاندہی پر لاش کو تلاش کرکے پوسٹ مارٹم کے لیے اسپتال منتقل کیا گیا۔پولیس کے مطابق ملزمان مقتول کے دوست تھے اور ملزم صادق مقتول کا مالک مکان بھی تھا جبکہ پولیس کی جانب سے مزید تحقیقات کا آغاز کردیا گیا۔