پی ٹی آئی وفد کی مولانا فضل الرحمان سے ملاقات، عمران خان کا پیغام پہنچایا

پاکستان تحریک انصاف کا وفد جمعیت علماء اسلام (جے یو آئی) کے سربراہ مولانا فضل الرحمان سے ملاقات کیلئے ان کی رہائش گاہ پہنچ چکا ہے۔ذرائع کے مطابق پی ٹی آئی کی طرف سے بیرسٹر گوہر خان، اسد قیصر، بیرسٹر سیف اللہ اور اخونزادہ حسین احمد پر مشتمل وفد نے آج مولانا فضل الرحمان سے ملاقات کی۔پی ٹی آئی کی قیادت کا جمعیت علماء اسلام کی قیادت سے رابطہ ہوا تھا۔مولانا فضل الرحمان نے پی ٹی آئی وفد کا خیر مقدم کیا۔ ملاقات میں حالیہ انتخابات اور سیاسی صورتحال پر بات چیت ہوئی، ساتھ ہی حالیہ انتخابات میں مبینہ دھاندلی سمیت تحفظات پر تبادلہ خیال کیا گیا۔پی ٹی آئی وفد نے سابق چیئرمین چیئرمین کا پیغام مولانا فضل الرحمان تک پہنچایا، اور انتخابات میں مبینہ دھاندلی اور اپوزیشن میں ساتھ چلنے کی دعوت دی۔خیال رہے کہ اڈیالہ جیل راولپنڈی کے باہر میڈیا سے گفتگو کرتے ہوئے پی ٹی آئی رہنما اسد قیصر کہہ چکے ہیں کہ عمران خان نے تمام سیاسی جماعتوں کے ساتھ بات کرنے کا ٹاسک دیا ہے، ہم الیکشن میں دھاندلی کے خلاف احتجاج کرنے والی جماعتوں سے رابطہ کریں گے اور جے یو آئی، اے این پی، جماعت اسلامی اور قوم پرست جماعتیں سب سے بات کریں گے۔گزشتہ روز پریس کانفرنس کرتے ہوئے مولانا فضل الرحمان نے کہا تھا کہ ہمارے پی ٹی آئی سے اختلافات رہے ہیں، ہمیں ان کے جسموں سے کوئی مسئلہ نہیں، ان کے دماغوں سے مسئلہ ہے، وہ ٹھیک ہوجائیں گے، اگر کوئی سمجھتا ہے کہ دھاندلی ہوئی تو ساتھ آجائے، اگر کوئی سمجھتا ہے کہ دھاندلی نہیں ہوئی تو وہ بیٹھ جائے اور عیاشی کرے