زمان پارک آپریشن کلین اپ مکمل، نوگو ایریا ختم ، پولیس نےکنٹرول سنبھال لیا

چیئرمین پی ٹی آئی عمران خان کی رہائش گاہ زمان پارک لاہور میں ضلعی انتظامیہ اور پولیس نے آپریشن کلین اپ کرکے علاقے کا مکمل طور پر کنٹرول حاصل کرلیا۔گزشتہ کئی ماہ سے زمان پارک میں عمران خان کی رہائش گاہ کی دونوں گلیوں کو بیریئرز اور کنٹینرز سے بند کیا گیا تھا اور زمان پارک کا علاقہ عام شہریوں کے لیے نو گو ایریا بن چکا تھا۔لاہور کی ضلعی انتظامیہ نے کرینوں کی مدد سے دونوں گلیوں کے بیریئرز اور کنٹینرز ہٹانے کا کام شروع کیا اور رات گئے تک کینال روڈ سے کنٹینر ہٹا کر روڈ کو کلیئر کر دیا۔جبکہ زمان پارک لاہور میں عمران خان کی رہائش گاہ کے ارد گرد سے اکا دکا کارکن بھی جا چکے ہیں اور ان کے لیے نصب کئے گئے خیمے اکھاڑ دئیے گئے ہیں ، اس کے علاوہ عمران خان کے گھر کے دروازے پر پولیس اہلکار بیٹھ گئے، آنے اور جانے والوں کی اینٹری بھی ہونے لگی ہے۔زمان پارک کے ارد گرد کی سڑکوں سے رکاوٹیں بھی دور کر دی گئیں ۔ دوسری جانب عمران خان اپنے گھر کے اندرونی حصوں کی تلاشی نہ دینے کی ضد پر قائم ہیں، انہوں نے سرکاری ٹیم کو سرچ آپریشن سے روک دیا۔اس حوالے سے وزیرِ اطلاعات پنجاب نے کہاکہ عمران خان کو 2200مطلوب افراد کی فہرست دے دی ہے جن میں سیکیورٹی فورسز کو انتہائی مطلوب عمران خان کا بھانجا حسان نیازی بھی شامل ہے