ذوالفقار علی بھٹو کی آج 44 ویں برسی منائی جا رہی ہے

پاکستان پیپلز پارٹی کے بانی چیئرمین اور سابق وزیراعظم ذوالفقار علی بھٹو کی 44 ویں برسی آج ملک بھر میں منائی جا رہی ہے۔ذوالفقار علی بھٹو کی 44 ویں برسی کے حوالے سے ان کی قبر پر پھولوں کی چادر چڑھائی جائے گی اور مرحوم کی روح کے ایصال ثواب کے لیے خصوصی دعا کی جائے گی۔ جلسہ عام رات 9 بجے گڑھی خدا بخش میں مزار بھٹو کے باہر شروع ہوگا جس سے پیپلز پارٹی کے چیئرمین بلاول بھٹو زرداری اور دیگر پارٹی رہنما خطاب کریں گے۔سابق وزیراعظم ذوالفقار علی بھٹو 5 جنوری 1928 کو لاڑکانہ میں پیدا ہوئے، ان کے والد، سر شاہ نواز بھٹو جوناگڑھ کی شاہی ریاست کے دیوان تھے، انہوں نے ابتدائی تعلیم بمبئی میں حاصل کی، بعدازاں بارکلے اور آکسفورڈ یونیورسٹی سے پولیٹیکل سائنس کی اعلیٰ تعلیم کے بعد لنکن ان سے وکالت پاس کی، 1953ء میں کراچی واپس آئے اور قانون کے لیکچرار رہے ، ساتھ ہی وکالت بھی جاری رکھی۔سابق وزیر اعظم نے 1967 میں پاکستان پیپلز پارٹی کی بنیاد رکھی، 1971 سے 1973 تک پاکستان کے چوتھے صدر کے طور پر خدمات انجام دیں، 1973 میں پارلیمنٹ سے متفقہ طور پر نئے آئین کی منظوری کے بعد وہ 14 اگست 1973 کو پاکستان کے وزیر اعظم بنے۔5 جولائی 1977 کو چیف آف آرمی سٹاف جنرل ضیاء الحق نے فوجی بغاوت میں بھٹو کو معزول کر دیا اور سابق وزیر اعظم کو ایک سیاسی مخالف احمد رضا خان قصوری کے قتل کی اجازت دینے کے الزام میں 1979 میں سپریم کورٹ کے ذریعے مقدمہ چلا کر پھانسی دے دی گئی۔