ڈونلڈ ٹرمپ کسی بھی لمحے ایران پر حملے کا حکم دے سکتے ہیں، امریکی میڈیا

امریکی صدر ڈونلڈ ٹرمپ ایران کے خلاف ممکنہ فوجی کارروائی کا فیصلہ کسی بھی لمحے کر سکتے ہیں۔ یہ دعویٰ امریکی خبر رساں ویب سائٹ ایکسیوس نے ایک اعلیٰ سرکاری عہدیدار کے حوالے سے کیا ہے۔رپورٹ کے مطابق صدر ٹرمپ نے عندیہ دیا ہے کہ اگر سفارتی کوششیں نتیجہ خیز ثابت نہ ہوئیں تو محدود فوجی کارروائی سمیت تمام آپشنز زیر غور ہیں۔ امریکی حکام کا کہنا ہے کہ مشرقِ وسطیٰ میں امریکی افواج کو الرٹ رکھا گیا ہے اور دفاعی تیاریوں کا جائزہ لیا جا رہا ہے۔دوسری جانب ایران نے خبردار کیا ہے کہ کسی بھی جارحیت کا سخت جواب دیا جائے گا اور خطے میں عدم استحکام کی ذمہ داری امریکہ پر عائد ہوگی۔ ایرانی قیادت کا کہنا ہے کہ وہ جنگ نہیں چاہتی، تاہم اپنی خودمختاری کے دفاع کے لیے تیار ہے۔عالمی مبصرین کے مطابق امریکہ اور ایران کے درمیان بڑھتی کشیدگی تیل کی عالمی منڈی، خطے کی سکیورٹی اور سفارتی تعلقات پر گہرے اثرات مرتب کر سکتی ہے۔تاحال کسی حتمی فوجی کارروائی کا اعلان نہیں کیا گیا، تاہم صورتحال تیزی سے بدل رہی ہے اور عالمی برادری کی نظریں واشنگٹن اور تہران پر مرکوز ہیں۔