بیٹی کو ہراساں کرنے کے الزام میں ماں گرفتار

اپنی ہی بیٹی اور اس کے بوائے فرینڈ کو انٹرنیٹ پر ہراساں کرنے کے الزام میں امریکی خاتون کوگرفتار کرلیا گیا۔ ریاست مشی گن کی رہائشی کیندرا گیل لیکاری نامی خاتون اپنی بیٹی اور اس کے بوائے فرینڈ کو ایک سال سے زائد عرصے تک بیوقوف بناتی رہی اور ہراساں کرتی رہی۔ انٹرنیٹ پر ہراسانی آج کل سوشل میڈیا کے سب سے بڑے مسائل میں سے ایک ہے لیکن اس سے متعلق عموماً یہی سننے میں آیا ہے کہ نوجوان اکثر اپنے ہم عمر کو اس کا نشانہ بناتے ہیں جس کے سنگین نتائج بھی نکلتے ہیں۔تاہم اب پہلی مرتبہ انٹرنیٹ پر ہراساں کرنے کا دلچسپ واقعہ رونما ہوا ہے جہاں ایک خواتین باسکٹ بال ٹیم کی کوچ اپنی بیٹی کو ہی اس کا شکار بنانے لگی۔ میڈیا رپورٹس کے مطابق وہ اپنی بیٹی اور اس کے بوائے فرینڈ کو اپنی شناخت چھپاتے ہوئے روزانہ 12 ٹیسٹ پیغامات بھیجا کرتی تھی۔ بیٹی نے اس پریشان کن صورتحال کی شکایت اپنی والدہ سے ہی کی جس کے بعد والدہ ہی متعلقہ حکام تک اس کی شکایت لے کر گئیں اور اس کا الزام انہوں نے ان کی دوستوں پر لگادیا۔ خاتون کی جانب سے شکایت درج کروانے کے بعد حکام نے دسمبر 2021 میں اس کی چھان بین شروع کردی تھی۔خاتون اور لڑکے کی والدہ نے مل اس شخص کو ڈھونڈنا شروع کردیا جو ان دونوں کے بچوں کو ہراساں کر رہا تھا۔تفتیش کاروں کو یہ معلوم ہوا کہ لڑکی کی والدہ ہی اسے میسجز کرتی تھیں۔ انہوں نے بیٹی کو 2021 کے آغاز سے پریشان کرنا شروع کیا تھا۔خاتون نے ابتدا میں تو اپنی شناخت چھپائی ہوئی تھی لیکن بعد جب ایف بی آئی کے آئی ٹی ایکسپرٹ اس معاملے کی تحقیقات میں شامل ہوئے تو انہوں نے لیکاری کی تمام سرگرمیوں کا پتہ چلالیا۔ان پر پانچ مقدمات بنائے گئے، جن میں دو کم عمر افراد کے سوشل میڈیا کا تعاقب کرنا، کمپیوٹر کا غلط استعمال کرتے ہوئےجرم کرنا اور ایک انصاف کی راہ میں رکاوٹ بننے کا تھا۔