بھارتی فوجی ٹرک بلندی سے کھائی میں جاگرا، 16 فوجی ہلاک ہوگئے

بھارتی فوج کا ٹرک بلند گھاٹی سے نیچے گرگیا ، جس کے نتیجے میں تین افسران سمیت 16 اہلکار ہلاک ہوگئے۔ میڈیا کے مطابق حادثہ ریاست سکم کے شمالی علاقے میں پیش آیا جہاں زیما کے علاقے میں بھارتی فوج کا ایک ٹرک بلند گھاٹی سے نیچے آگرا جس میں اب تک 16 فوجیوں کے ہلاک ہونے کی تصدیق کی گئی ہے ۔بھارتی میڈیا کے مطابق حادثے میں تین جونیئر کمیشنڈ آفیسر اور 13 سپاہی جان کی بازی ہارگئے ۔میڈیا رپورٹس کے مطابق حادثہ اس وقت پیش آیا جب بھارتی فوج کی تین گاڑیوں کا قافلہ آج تھانگو کی طرف روانہ ہورہا تھا کہ اس دوران قافلے میں شامل ایک ٹرک بے قابو ہوکر ڈھلان کے راستے سے نیچے آگرا۔بھارتی میڈیا کے مطابق حادثے کے بعد علاقے میں فوری ریسکیو آپریشن شروع کردیا گیا ہے اور ٹرک سے 4 فوجیوں کو زخمی حالت میں نکال کر اسپتال منتقل کیا گیا ہے۔دوسری جانب بھارتی وزیردفاع کی جانب سے المناک حادثے پر گہرے دکھ کا اظہار کیا گیاہے ۔