کراچی میں خاتون پر تشدد کا معاملہ، نامزد ملزم نعمان کا مؤقف سامنے آ گیا

اپنے ویڈیو پیغام میں نامزد ملمز نعمان کا کہنا کہ تشدد کی ویڈیو ایک سازش کے تحت وائرل کی گئی، ہمارے گھر کے نیچے رہائش پذیر کرائے دار مختیار کافی عرصے سے ہم سے گھر خالی کروانے کا مطالبہ کر رہا تھا اور یہی معاملہ اس تنازع کا سبب بنا۔

نعمان کا کہنا ہے کہ وائرل کی جانے والی ویڈیو بھی اسی سازش کا حصہ ہے، پانی کے معاملے پر اس سے قبل بھی مختیار سے جھگڑا ہو چکا تھا، مختیار نے اپنی ماسی کو بھڑکایا اور اس دوران میرے بیٹے پر بھی تشدد کیا گیا، خاتون بچے پر تشدد کر رہی تھی، اسی دوران یہ واقعہ پیش آیا۔

نامزد ملزم نعمان نے کہا کہ مختیار نے سازش کے تحت آدھی ویڈیو وائرل کی جبکہ مکمل واقعے کی حقیقت سامنے نہیں لائی گئی، واقعے کے بعد میں خود گبول ٹاؤن تھانے پولیس کے پاس بھی گیا تھا، یہ واقعہ 10 دسمبر کو پیش آیا تھا جبکہ ویڈیو بعد میں وائرل کی گئی۔

نعمان کا مزید کہنا تھا کہ میں اپنی غلطی کی وجہ سے پھنس گیا، میں نے معافی کی کوشش بھی کی تاہم مجھ سے پیسوں کا مطالبہ کیا گیا جو میں ادا نہیں کر سکتا۔