وائٹ ہاؤس کی پریس سیکریٹری کا لباس چین میں تیار ہونے کا دعویٰ

چینی سفارت کار نے دعویٰ کیا ہے کہ امریکی وائٹ ہاؤس کی پریس سیکریٹری نے جو لباس پہنا وہ چین میں تیار ہوا۔امریکا اور چین کے درمیان تجارتی جنگ اب سوشل میڈیا پر بھی پھیل گئی ہے جہاں دونوں ممالک کے صارفین ایک دوسرے کو نشانہ بنا رہے ہیں۔

اس حوالے سے تازہ ترین ہدف وائٹ ہاؤس کی پریس سیکریٹری کیرولین لیویٹ کو بنایا گیا ہے جن کے بارے میں مبینہ طور پر دعویٰ کیا گیا ہے کہ انہوں نے چین میں بنایا گیا لباس پہنا ہے، غیر ملکی میڈیا کے مطابق انڈونیشیا میں چینی قونصل جنرل ژانگ ژی شینگ نے وائٹ ہاؤس کی پریس سیکریٹری کیرولین لیویٹ کی تصویر شیئر کی ہے اور اس حوالے سے اسکرین شاٹس شیئر کیے ہیں۔جس پر ایک صارف نے دعویٰ کیا کہ اس لباس پر لگی لیس چین کے شہر مابو کی ایک فیکٹری سے آئی ہے جہاں وہ کام کرتے ہیں۔بعد ازاں کئی صارفین کیرولین لیویٹ کے دفاع میں سامنے آئے ہیں اور انہوں نے لباس کو چینی کاپی، مذاق اور دھوکا دہی قرار دیا ہے۔ایک صارف نے لباس کے فرانسیسی ہونے کا بھی دعویٰ کیا ہے۔