ٹی 20 ورلڈکپ کا سپر 8 مرحلہ: دفاع چیمپئن انگلینڈ نے ویسٹ انڈیز کو شکست دے دی

آئی سی سی مینز ٹی 20 ورلڈ کپ 2024 کے سپر 8 مرحلے میں سنسنی خیز مقابلے جاری ہیں، گروپ ٹو کے دوسرے میچ میں انگلش بیٹرز فل سالٹ اور جونی بیرسٹو کی دھواں دھار بیٹنگ کی بدولت دفاعی چیمپئن انگلینڈ نے ویسٹ انڈیز کو 8 وکٹوں سے شکست دے دی۔انگلینڈ نے ویسٹ انڈیز کی جانب سے دیا گیا181 رنز کا ہدف 2 وکٹوں کے نقصان پر 17.3 ویں اوور میں پورا کر لیا۔سینٹ لوشیا کے ڈیرن سیمی کرکٹ اسٹیڈیم میں کھیلے گئے آئی سی سی ٹی 20 ورلڈ کپ کے سپر 8 مرحلے کے دوسرے میچ میں انگلش ٹیم کے کپتان جوز بٹلر نے ٹاس جیت کر ویسٹ انڈیز کو پہلے بیٹنگ کی دعوت دی۔انگلینڈ کی دعوت پر میزبان ویسٹ انڈیز نے مقررہ 20 اوورز میں 4 وکٹوں کے نقصان پر 180 اسکور کیے۔ویسٹ انڈیز نے بیٹنگ کا آغاز کیا اور ذمہ داری سے کھیلتے ہوئے انگلش باؤلرز کو مشکل میں ڈالے رکھا، اوپنر برینڈن کنگ 23 رنز پر ریٹائرڈ ہرٹ ہو کر واپس لوٹ گئے، ان کی جگہ پر آنے والے نکولس پورن نے جونسن چارلس کا بھرپور ساتھ دیا اور ٹیم کا مجموعی سکور 94 تک پہنچا دیا اس کے بعد جونسن چارلس 38 رنز پر کیچ دے بیٹھے۔جونسن چارلس کے آؤٹ ہونے کے بعد کپتان رومن پاول نے بھی انگلش بولرز کی ایک نہ چلنے دی اور 17 بالز پر 36 رنز بنا کر پویلین لوٹے جبکہ نکولس پورن بھی 36 رنز ہی بناسکے۔اس کے علاوہ شرفین رتھرفورڈ 28 رنز کے ساتھ ناٹ آؤٹ رہے جبکہ جارح مزاج بیٹر آندرے رسل صرف ایک ہی رن بنا پائے۔انگلینڈ کی جانب سے جوفرا آرچر، عادل رشید، معین علی اور لیام لیونگسٹون نے ایک ایک کھلاڑی کو آؤٹ کیا۔یاد رہے کہ گزشتہ روز ٹی 20 ورلڈکپ میں سپر 8 مرحلے کے پہلے میچ میں جنوبی افریقا نے میزبان امریکا کو شکست دی تھی۔واضح رہے کہ ایونٹ میں ویسٹ انڈیز کی ٹیم ابھی تک ناقابل شکست تھی جبکہ انگلینڈ کو آسٹریلیا کے ہاتھوں شکست کا سامنا کرنا پڑا تھا۔میگا ایونٹ کے سپر 8 مرحلے کے گروپ ون میں آج بھارت اور افغانستان کی ٹیمیں ٹکرائیں گی، یہ میچ پاکستانی وقت کے مطابق رات ساڑھے 7 بجے شروع ہوگا۔گروپ ون کے دوسرے میچ میں بنگلہ دیش اور آسٹریلیا کی ٹیمیں جمعے کی صبح ساڑھے 5 بجے آمنے سامنے ہوں گی