بھارتی جیل میں تصادم، قیدیوں نے پولیس کو بھی نہ بخشا

بھارتی پنجاب کے سینٹرل جیل میں قیدیوں کے درمیان لڑائی چھڑوانے والے پولیس اہلکار بھی جھگڑے کی لپیٹ میں آگئے، قیدیوں کے تشدد سے اہلکار سمیت 4 افراد زخمی ہو گئے۔بھارتی پنجاب کے شہر گرداسپور کی سینٹرل جیل میں قیدیوں کے درمیان لڑائی کا واقعہ پیش آیا، جہاں دو قیدی آپس میں لڑ پڑے۔بھارتی میڈیا کے مطابق پولیس اہلکاروں سمیت جیل حکام نے دونوں قیدیوں کے درمیان بیچ بچاؤ کرانے کی کوشش کی۔تاہم قیدیوں نے پولیس اہلکاروں کو بھی تشدد کا نشانہ بنا ڈالا۔بھارتی میڈیا کے مطابق زخمی پولیس اہلکار کی شناخت مندیپ سنگھ کے نام سے ہوئی ہے جو کہ جیل سیکیورٹی کی ذمہ داریاں نبھا رہا تھا۔اس کے علاوہ ایس ایچ او دھڑیوال اور اے ایس آئی جگدیپ سنگھ کو بھی طبی امداد کے لیے اسپتال منتقل کر دیا گیا ہے۔کشیدہ صورتحال کے باعث جیل میں اضافی پولیس کی نفری کو بھی طلب کر لیا گیا ہے، پولیس کی نفری پٹھان کوٹ، بٹالہ اور امرتسر سے طلب کی گئی ہے۔