توشہ خانہ ریفرنس: فرد جرم کی کارروائی کیلئے 4 جنوری کی تاریخ مقرر

توشہ خانہ ریفرنس میں احتساب عدالت نے سابق چیئرمین پاکستان تحریک انصاف عمران خان اور ان کی اہلیہ بشریٰ بی بی پر فرد جرم کی کارروائی کیلئے 4 جنوری کی تاریخ مقرر کردی ہے۔احتساب عدالت کے جج محمد بشیر نے توشہ خانہ ریفرنس کی سماعت اڈیالہ جیل میں کی۔نیب کے ڈپٹی پراسیکیوٹر جنرل سردار مظفر عباسی ٹیم کے ہمراہ عدالت میں پیش ہوئے جبکہ سابق چیئرمین پی ٹی آئی کے وکیل سردار لطیف کھوسہ عدالت میں پیش ہوئے۔سماعت کے دوران سابق چیئرمین پی ٹی آئی کمرہ عدالت میں موجود تھے، نیب کے ڈپٹی پراسیکیوٹر نے وکلاء صفائی کو توشہ خانہ ریفرنس، انکوائری رپورٹ سمیت متعلقہ تمام دستاویزات کی نقول فراہم کردی ہیں۔ عدالت نے توشہ خانہ ریفرنس کیس میں سابق چیئرمین پی ٹی آئی اور بشریٰ بی بی پر فرد جرم کی کاروائی کیلئے 4 جنوری کی تاریخ مقرر کردی ہے، توشہ خانہ اور 190 ملین پاؤنڈ اسکینڈل ریفرنس میں عمران خان اور بشریٰ بی بی کی درخواست ضمانتوں پر دلائل جاری ہیں۔وکلاء صفائی نے ضمانت کی درخواستوں پر اپنے دلائل مکمل کیے، نیب پراسیکیوشن ٹیم نے ضمانت کی درخواستوں پر ابتدائی دلائل مکمل کرلیے مزید دلائل کیلئے عدالت نے سماعت 30 دسمبر تک ملتوی کردی ہے