انتخابی عمل کا آغاز ہوگیا آج کاغذات نامزدگی کل سے وصولی

عام انتخابات 2024 کے لیے انتخابی عمل کا باقاعدہ آغاز آج سے ہو رہا ہے، ملک بھر میں ڈسٹرکٹ ریٹرننگ آفیسرز کی ٹریننگ کا آج آخری روز ہے، جبکہ الیکشن کمیشن کی طرف سے جاری کردہ انتخابی شیڈول کے مطابق کاغذات نامزدگی وصول کرنے کے لیے ریٹرننگ افسران آج پبلک نوٹس جاری کریں گے۔الیکشن کمیشن کی جانب سے جاری کردہ شیڈول کے مطابق کاغذات نامزدگی جمع کرانے کی تاریخ 20 تا 22 دسمبر ہے۔الیکشن کمیشن نے سیاسی جماعتوں کی توجہ الیکشن ایکٹ کے سیکشن 104 کی طرف مبذول کراتے ہوئے انہیں مشورہ دیا ہے کہ وہ خواتین اور غیرمسلموں کے لیے مخصوص نشستوں پر اپنے امیدواروں کی ترجیحی فہرستیں 22 دسمبر یا اس سے پہلے جمع کرائیں۔کاغذات نامزدگی کی جانچ پڑتال 24 تا 30 دسمبر ہوگی اور اعتراضات 3 جنوری تک دائر کیے جا سکیں گے۔کاغذات نامزدگی کے خلاف اپیلیں 10 جنوری تک سنی جائیں گی۔شیڈول کے مطابق امیدواروں کی نظر ثانی فہرست 11 جنوری 2024 کو جاری کی جائے گی۔جبکہ 13 جنوری کو امیدواروں کو انتخابی نشان الاٹ کیے جائیں گے۔ملک بھر میں عام انتخابات 8 فروری 2024 کو ہوں گے۔ملک بھر کے 144 ڈسٹرکٹ ریٹرننگ افسران (ڈی آر اوز) اور 859 ریٹرننگ افسران (آر اوز) آج حلف اٹھائیں گے۔آج الیکشن کمیشن کی جانب سے ملک بھر میں ڈی آر اوز کی ٹریننگ کا آخری روز ہے۔ الیکشن کمیشن کی جانب سے ملک بھر میں ڈویژنل سطح پر ٹریننگ جاری ہے۔الیکشن کمیشن کا کہنا ہے کہ ریٹرننگ آفیسرز کی 2 روزہ ٹریننگ کل مکمل کرلی گئی ہے۔الیکشن کمیشن کے مطابق 859 ریٹرننگ افسران اور 144 ڈسٹرکٹ ریٹرننگ افسران کو ٹریننگ دی جارہی ہے۔ٹریننگ الیکشن کمیشن کے سینئر افسران دے رہے ہیں۔حلف برداری کے طریقہ کار کی وضاحت کرتے ہوئے ای سی پی کے ایک اہلکار نے کہا کہ صوبائی الیکشن کمشنر ڈی آر اوز سے حلف لیں گے، جو اس کے بعد اپنے اپنے ضلع میں ہر آر او اور اسسٹنٹ آر او سے حلف لیں گےآر اوز اپنے دائرہ اختیار کے تحت ہر پریذائیڈنگ افسر سے حلف لیں گے اور پریزائیڈنگ آفیسر پولنگ شروع ہونے سے پہلے اپنے دائرہ اختیار کے تحت پولنگ عملے کے ہر رکن کو حلف دلائے گا۔اسی طرح قانون نافذ کرنے والے ادارے کا سربراہ یا اس کے ذریعہ اختیار دہندہ افسر اس سلسلے میں الیکشن ڈیوٹی پر تعینات ہر اہلکار کو حلف دلائے گا۔