فوجی عدالتوں میں سویلینز کا ٹرائل: پنجاب حکومت کی سپریم کورٹ کے فیصلے کیخلاف اپیل دائر

پنجاب حکومت نے فوجی عدالتوں میں سویلینز کے ٹرائل سے متعلق سپریم کورٹ کے فیصلے کے خلاف اپیل دائر کردی۔فوجی عدالتوں میں سویلینز کے ٹرائل کو کالعدم قرار دینے سے متعلق پنجاب حکومت نے سپریم کورٹ کے فیصلے کے خلاف اپیل دائر کردی۔ اپیل ایڈوکیٹ جنرل پنجاب کی جانب سے دائر کی گئی۔درخواست میں سپریم کورٹ کے فوجی عدالتوں سے متعلق فیصلے کو کالعدم قراردینے کی استدعا کی گئی ہے۔اپیل میں مؤقف اختیار کیا گیا کہ معاملہ 199 کے تحت ہائیکورٹ میں جانا چاہیئے تھا، سپریم کورٹ نے 184 تین کے تحت اپنا آئینی دائرہ اختیار استعمال کیا، دیگر فورمز موجود ہوں تو 184 تین کا دائرہ اختیار استعمال نہیں کیا جاسکتا، سپریم کورٹ کا فیصلہ آئین، قانون اور حقائق کے خلاف ہے۔اپیل میں مزید کہا گیا کہ آرمی ایکٹ کی طرز پر مختلف عدالتیں ملک بھر میں کام کررہی ہیں، فوجی عدالتیں اور عام عدالتیں 1947 سے کام کررہی ہیں، خصوصی عدالتوں میں ملزمان کا ٹرائل قانون کے مطابق چلایا جاتا ہے۔