کرک تھانے پر دہشتگردوں کا حملہ پسپا، ایک پولیس اہلکار زخمی

کرک کے تھانہ خرم پر دہشت گردوں نے راکٹ لانچرز اور بھاری ہتھیاروں سے حملہ کیا جسے پولیس نے جوابی کارروائی کرکے حملہ ناکام بنا دیا۔رات گئے نامعلوم دہشتگردوں نے راکٹ لانچروں اور دیگر چھوٹے بڑے ہتھیاروں سے تھانہ خرم پر حملہ کیا تاہم پولیس کی بروقت جوابی کارروائی سے پولیس نے حملہ ناکام بنایا اور حملہ آور پسپا ہوگئے۔اطلاع ملنے پر ڈی پی او سجاد خان کوئیک رسپانس فورس کے ہمراہ تھانہ خرم پہنچے تھے۔حملے کے نتیجے میں ایک سپاہی نوید اقبال معمولی زخمی ہوا جسے علاج کے لیے ڈی ایچ کیو اسپتال کرک منتقل کردیا گیا۔حملہ پسپا ہونے کے بعد پولیس نے بڑے پیمانے پر کلیرنس آپریشن شروع کردیا۔