آئی سی سی ایلیٹ پینل میں موجود واحد پاکستانی امپائر کے نام ایک اور اعزاز

آئی سی سی ایلیٹ پینل میں شامل واحد پاکستانی امپائر احسن رضا کل ایک اور اعزاز اپنے نام کریں گے جبکہ انگلینڈ اور نیدرلینڈ کا میچ ان کا 50واں ون ڈے انٹرنیشنل میچ ہوگا۔لاہور سے تعلق رکھنے والے احسن رضا آئی سی سی کرکٹ ورلڈ کپ میں ذمہ داریاں نبھانے والے واحد پاکستانی امپائر ہیں۔انگلینڈ اور نیدرلینڈ کے میچ کو سپروائزر کرکے وہ علیم ڈار، اسد روف اور خضر حیات کے بعد 50 ون ڈے میچ کرانے والے چوتھے پاکستانی امپائر بن جائیں گے۔رواں برس مارچ میں علیم ڈار کی جگہ انٹرنیشنل پینل سے ترقی دے کر آئی سی سی نے احسن رضا کو ایلیٹ پینل میں شامل کیا تھا۔ احسن رضا کو سب سے زیادہ 74 ٹی ٹوئنٹی انٹرنیشنل میچ سپروائزر کرنے کا اعزاز بھی حاصل ہے۔رواں سال انہوں نے آسٹریلیا اور انگلینڈ کی ایشیز سیریز میں پہلی بار امپائرنگ کی تھی۔وہ اب تک نو ٹیسٹ میچز بھی سپر وائز کرچکے ہیں۔احسن رضا نے 50 ون ڈے میچز کے اعزاز کو اپنی اہلیہ کے نام کیا ہے۔ جہنوں نے ہمیشہ اچھے اور برے لمحات میں بھرپور ساتھ دیتے ہوئے آگے بڑھنے کا حوصلہ دیا۔