awareinternational A Credible Source Of News
نگراں وفاقی کابینہ نے حج پالیسی 2024 اور اینٹی ہیومن اسمگلنگ اسٹیشن قائم کرنے کی منظوری دے دی جبکہ اجلاس میں گیس کی قیمتوں میں اضافہ کا معاملہ زیر غور نہ آسکا۔نگراں وزیراعظم انوار الحق کاکڑ کی زیرصدارت وفاقی کابینہ کا اجلاس ہوا، جس میں 14 نکاتی ایجنڈے پرغور کیا گیا اور اہم فیصلوں کی منظوری دی گئی۔ذرائع کے مطابق نگراں وفاقی کابینہ نے حج پالیسی 2024 کی منظوری دے دی جبکہ اینٹی ہیومن اسمگلنگ اسٹیشن قائم کرنے کی بھی منظوری دی گئی، اینٹی ہیومن اسمگلنگ اسٹیشن ایف آئی اے قائم کرے گا۔کابینہ کوغیرقانونی افغان شہریوں کو نکالنے سے متعلق آرڈر پر بھی بریفنگ دی گئی جس میں بتایا گیا کہ فارن ایکٹ 1947 کے تحت تمام صوبوں کو بے دخلی آرڈر جاری کردیا اور پولیس سمیت متعلقہ اداروں کوغیرقانونی مقیم غیرملکیوں کو حراست میں لینے کا پابند کیا ہے۔ معمولی جرائم میں انڈر ٹرائل اور سزایافتہ غیرملکیوں کو بے دخل کیا جائے گا، سنگین جرائم میں ملوث غیر ملکیوں کو بے دخل نہیں کیا جائے گا، ضلعی انتظامیہ، پولیس، پراسیکیوشن اورجیل انتظامیہ کوخصوصی اختیارات دیے گئے ہیں، چاروں صوبوں میں گرفتارغیرملکیوں کو رکھنے اور بے دخل کرنے کے لیے خصوصی سینٹرز قائم کردیے گئے ہیں۔ذرائع نے بتایاکہ گیس کی قیمتوں میں اضافے کا فیصلہ فی الحال روک دیا گیا اور کابینہ نے گیس کی قیمتوں میں اضافے پر وزارت توانائی کو مزید غورکرنے کی ہدایت کی ہے۔
