ایک ہزار خواتین کے جنسی استحصال کا مرتکب ایپسٹین، متاثرہ خواتین کا شناخت کے تحفظ کا مطالبہ

امریکی وزارت انصاف کی جانب سے جیفری ایپسٹین سے متعلق لاکھوں دستاویزات اور تصاویر منظر عام پر لائے جانے کے بعد، “نیویارک ٹائمز” اخبار کی رپورٹ کے مطابق ایک امریکی جج بدھ کے روز جنسی جرائم میں ملوث اس شخص کی متاثرہ خواتین کی جانب سے دائر کردہ درخواست کی سماعت کریں گے۔ اس درخواست میں متاثرہ خواتین نے اپنی پرائیویسی کے تحفظ کے لیے جاری کردہ فائلوں سے اپنے نام نکالنے کا مطالبہ کیا ہے۔متاثرین کے وکلاء کی جانب سے بھیجے گئے ایک خط میں بتایا گیا ہے کہ اس اجرا کی وجہ سے تقریباً سو خواتین کی زندگیاں “شدید متاثر” ہوئی ہیں۔خط میں مزید کہا گیا ہے کہ اٹارنی جنرل پام بونڈی نے پیر کو عدالت کو لکھے گئے ایک خط میں اشارہ دیا ہے کہ وزارت انصاف نے پوری ہفتہ وار تعطیل کے دوران “ہزاروں دستاویزات اور میڈیا مواد کو ہٹانے” پر کام کیا ہے، جن میں نادانستہ طور پر ایسی معلومات شامل ہو گئی تھیں جن سے متاثرین کی شناخت ظاہر ہو سکتی تھی. یہ پیش رفت امریکی وزارت انصاف کی جانب سے جمعہ کے روز ایپسٹین سے متعلق دستاویزات کی نئی کھیپ شائع کرنے کے بعد سامنے آئی ہے۔ وزارت نے اس بات کی تصدیق کی ہے کہ یہ قدم ڈونلڈ ٹرمپ کی انتظامیہ کے اس مطالبے پر اٹھایا گیا ہے جس میں اس حساس کیس میں مکمل شفافیت فراہم کرنے پر زور دیا گیا تھا۔”نیویارک ٹائمز” کے مطابق، وکلاء نے دستاویزات کی اشاعت کے عمل کی نگرانی کے لیے ایک آزاد مبصر مقرر کرنے کی بھی درخواست کی ہے۔اتوار کو اخبار نے ایک رپورٹ شائع کی تھی جس میں بتایا گیا تھا کہ وزارت انصاف نے ان فائلوں میں برہنہ نوجوان خواتین کی جو غالباً کم عمر تھیں، تصاویر بھی شائع کر دی ہیں۔ شائع شدہ 30 لاکھ صفحات میں سے تقریباً 40 تصاویر ایسی رہ گئی تھیں جن میں واضح جنسی مواد موجود تھا یا جن سے متاثرین کی شناخت ظاہر ہو رہی تھی۔واضح رہے کہ ایپسٹین پر نابالغ لڑکیوں سمیت ایک ہزار سے زائد نوجوان خواتین کے جنسی استحصال کا الزام ہے۔ اس دوران ان متعدد مشہور شخصیات کے نام بھی سامنے آئے ہیں جن کے اس سے تعلقات تھے یا جو “ایپسٹین آئی لینڈ” کے نام سے مشہور جزیرے کا دورہ کرتے تھے، یہ جزیرہ بحیرہ کیریبین میں سینٹ تھامس کے ساحل پر واقع ہے۔ایپسٹین 2019 میں جنسی زیادتی کے الزامات کے تحت مقدمہ چلنے سے قبل نیویارک میں اپنی جیل کی کوٹھری میں مردہ پایا گیا تھا۔ اس کی موت نے سازشی نظریات کو جنم دیا جن میں کہا جاتا ہے کہ اسے ممتاز شخصیات کو بچانے کے لیے قتل کیا گیا تھا۔