کویڈ 19 کیسز میں اضافہ، ایئرپورٹس پر اسکریننگ کا عمل شروع

پاکستان سول ایوی ایشن اتھارٹی نے کئی ممالک میں کویڈ19 کیسز میں اضافہ کے پیش نظر ملکی ایئرپورٹس پر اسکریننگ کی ہدایات کا نفاذ شروع کر دیا ہے۔پاکستان سول ایوی ایشن اتھارٹی کے ترجمان کی طرف سے جاری بیان کے مطابق تمام بین الاقوامی فلائٹس کے دو فیصد مسافروں کی اسکریننگ کے احکامات فوری نافذ العمل ہوں گے۔ این سی او سی ہدایات کے بعد ملک کے بڑے ایئرپورٹس پر مسافروں کی کویڈ-19 اسکریننگ بتدریج شروع کر دی گئی ہے ۔ہر فلائٹ کے دو فیصد مسافروں کا ریپڈ اینٹیجن ٹیسٹ ہوگا۔ترجمان نے کہا کہ دن میں کم سے کم ایک مرتبہ مسافر لاونجز میں فیومیگیشن کرنے کی بھی ہدایت جاری کی گئی ہیں ، ایئرپورٹس پر عملہ کو بارڈر ہیلتھ سروسز اہلکاروں کو ہرممکن تعاون فراہم کرنے کی ہدایات جاری کر دی گئی ہیں