اہم شخصیات کی سکیورٹی کےلیے ساڑھے 4 کروڑ سے شاہراہوں پر ایچ ڈی کیمرے لگانے کا منصوبہ

وفاقی دارالحکومت اسلام آباد میں ملکی و غیر ملکی اہم شخصیات کی فل پروف سیکیورٹی یقینی بنانے کے لئے اسلام آباد ایئرپورٹس سے ریڈ زون کے روٹ پر جدید ترین ایچ ڈی کیمرے نصب کرنے کا منصوبہ بنایا گیا ہے جس سے ان شخصیات کی نگرانی کی جائے گی۔وفاقی پولیس نے اس پراجیکٹ پر عملدرآمد کیلئے حکومت سے ایچ ڈی کیمروں کی خریداری کیلئے ساڑھے چار کروڑ روپے سے زائد مانگ لیے ہیں، اس حوالے سے فنڈز کیلئے وزارت داخلہ کو خط لکھ دیا گیا ہے۔پراجیکٹ کے تحت تمام کیمرے شاہراہ سری نگر اور شاہراہ اسلام آباد پر نصب کیے جائیں گے، جدید کیمروں سے نورخان ایئر بیس اور اسلام آباد ایئرپورٹ سے ریڈ زون تک نگرانی ممکن ہو سکے گی، ان روٹس پر صدر، وزیر اعظم، غیر ملکی وفود اور سفارتکاروں کی آمد و رفت ہوتی ہے۔خط میں مزید کہا گیا ہے کہ دونوں روٹس پر ایچ ڈی کیمروں کی تنصیب پر 4 کروڑ 53 لاکھ روپے کی لاگت آئے گی، وی آئی پی موومنٹ کے ساتھ ساتھ ان شاہراہوں کی نگرانی سے جرائم پر قابو پانے میں بھی مدد ملے گی۔بتایا گیا ہے کہ وزارت داخلہ کی ہدایت پر ہی اس مہنگے ترین منصوبے کا پیپر ورک مکمل کیا گیا ہے اور اب رسمی طور پر باقی مراحل باقی ہیں