نگران وزیراعلیٰ پنجاب، اپوزیشن لیڈر قومی اسمبلی اور الیکشن کمیشن کے 2 ممبران کی تقرری سپریم کورٹ میں چیلنج

تحریک انصاف نے نگران وزیر اعلیٰ پنجاب محسن نقوی کی تقرری کو سپریم کورٹ آف پاکستان میں چیلنج کردیا ہے۔سپریم کورٹ میں دائر درخواست میں سیکرٹری جنرل تحریک انصاف اسد عمر نے یہ استدعا کی ہے کہ محسن نقوی کو بطور نگران وزیر اعلی کام سے روکا جائے۔ درخواست کے متن میں کہا گیا ہے کہ ’ایک ایسے شخص کو تعینات کیا گیا ہے جس کے پاس سیاسی، آئینی اور بیوروکریٹک تجربہ نہیں۔‘پی ٹی آئی کی درخواست میں استدعا کی گئی ہے کہ ’الیکشن کمیشن اور اس کے ارکان نے نگران وزیر اعلیٰ پنجاب کی تقرری میں آئینی تقاضوں کی خلاف ورزی کی ہے۔۔۔ انھیں صاف و شفاف الیکشن کے انعقاد کی راہ میں متعصب اور نااہل قرار دیا جائے۔‘اس میں مطالبہ کیا گیا ہے کہ درخواست پر فیصلے تک نگران وزیر اعلیٰ پنجاب محسن نقوی کو کام سے روکا جائے۔جبکہ تحریک انصاف نے اسی درخواست میں راجہ ریاض کو اپوزیشن لیڈر بنانے کا نوٹی فیکیشن بھی چیلنج کیا ہے۔اس درخواست میں استدعا کی گئی کہ الیکشن کمیشن کے دو ممبر بابر حسن بھروانہ اور اکرام اللہ خان کی تعیناتی غیر آئینی قرار دی جائے