ملک بھر میں طویل اور غیر اعلانیہ لوڈشیڈنگ: وزیراعظم نے اجلاس طلب کرلیا

وزیراعظم شہباز شریف نے ملک میں طویل لوڈشیڈنگ اور بجلی کی طلب و رسد کے حوالے سے اہم اجلاس طلب کرلیا جس میں وزارت پانی و بجلی کی جانب سے بریفنگ دی جائے گی۔واضح رہے کہ ملک بھر میں غیراعلانیہ طویل لوڈشیڈنگ کے باعث کئی مقامات پر احتجاج جاری ہے ہیں۔ کئی مقامات پر 6 گھنٹے تک بجلی کی لوڈشیڈنگ ہے اور لائن لاسز والے علاقوں میں 14 گھنٹے تک کی لوڈشیڈنگ کی جارہی ہے، اب تفصیلات منظر عام پر آئی ہیں کہ ملک بھر میں بجلی کا شارٹ فال 5ہزار319میگاواٹ تک پہنچ گیا جبکہ بجلی کی طلب 25 ہزار میگاواٹ ہے۔ذرائع کے مطابق لوڈ شیڈنگ، بجلی کی طلب ور سد سے متعلق اجلاس آج طلب کیا گیا اور وزیراعظم شہباز شریف اجلاس کی صدارت کریں گے۔ادھر پشاور میں بجلی لوڈشیڈنگ کے خلاف جاری احتجاج کے دوران مظاہرین نے پشاورایم ون سے چارسدہ تک موٹروے کو بند کردیا۔ بجلی لوڈ شیڈنگ کے خلاف شہری سڑکوں پر نکل آئے اور اکبر پورہ اور قریبی دیہات کے شہریوں نے موٹروے کو احتجاجاً بند کردیا۔مظاہرین نے کہا کہ اکبر پورہ اور ملحقہ علاقوں میں 12 سے 16 گھنٹے لوڈ شیڈنگ کی جارہی ہے، جب تک غیر اعلانیہ لوڈ شیڈنگ کم کرنے کی یقین دہانی نہ کرائی گئی احتجاج ختم نہیں کرینگے۔