ایرانی صدر رئيسی کی نماز جنازہ آج ادا کی جائیگی، شہباز شریف سمیت عالمی رہنما شریک ہونگے

ایرانی صدر ابراہیم رئیسی، وزیرخارجہ حسین امیر اور دیگر افراد کی نمازجنازہ آج ادا کی جائے گی۔ میتیں گزشتہ روز ہی تبریز سے تہران پہنچا دی گئی تھیں ۔پاکستان سے وزیر اعظم شہباز شریف کی نماز جنازہ میں شرکت متوقع ہے۔جبکہ دنیا بھر سے اعلی شخصیات تہران پہنچ رہی ہیں ایران کے سپریم لیڈر آیت اللّٰہ خامنہ ای ہیلی کاپٹر حادثے میں جاں بحق ایرانی صدر سمیت دیگر افراد کی نماز جنازہ پڑھائیں گے۔چالیس ممالک کے سربراہان کی نماز جنازہ میں شرکت متوقع ہے۔ تہران میں لوگوں کی بڑی تعداد جمع ہے، لاکھوں سوگوار شہری صدر ابراہیم رئیسی کے آخری دیدار کے لیے جوق در جوق پہنچ رہے ہیں۔صدر اور ان کے ساتھیوں کی میتیں طیارے کے ذریعے تبریز سے تہران لائی گئیں، ایرانی صدر کو آبائی شہر مشہد میں امام علی رضا علیہ السلام کے روضہ کے احاطہ میں سپرد خاک کیا جائے گا۔یاد رہے کہ ایرانی صدر ابراہیم رئیسی کا ہیلی کاپٹر 19 مئی بروز اتوار حادثے کا شکار ہوا تھا، جس کا ملبہ چودہ گھنٹے بعد پیر کو ملا تھا۔صدر ابراہیم رئیسی آذربائیجان کی سرحد پر ڈیم کی افتتاحی تقریب سے واپس آرہے تھے کہ ہیلی کاپٹر گر کر تباہ ہوا، جس کے نتیجے میں ایرانی صدر، وزیر خارجہ حسین امیر عبد اللہیان سمیت نو افراد جاں بحق ہوگئے تھےواضح رہے کہ ابراہیم رئیسی کے ہیلی کاپٹر حادثے میں جاں بحق ہونے کے بعد نائب صدر محمد مخبر نے ایران کے صدر کی ذمے داریاں سنبھال لی ہیں، ایران میں باقاعدہ صدارتی انتخاب 28 جون کو ہوگا۔