اردن ائیر بیس سے عراق میں ایرانی حمایت یافتہ ملیشیا کے کیمپ پر حملہ، امریکا اسرائیل کی تردید

عراق میں ایرانی حمایت یافتہ ملیشیا کے ایک کیمپ میں دھماکوں سے تین افراد جاں بحق ہوگئے۔ عینی شاہدین کے مطابق کیمپ کے اندر پانچ دھماکے ہوئے۔ اسرائیل اور امریکا کے حکام نے ان دھماکوں میں اپنی اپنی فوج کے ملوث ہونے کی تردید کی ہے۔مغربی میڈیا کے مطابق یہ حملہ گزشتہ رات اردن ائیر بیس سے اڑنے والے جیٹ طیاروں نے کی تاہم اِن حملوں کے بارے میں بہت حد تک خاموشی بھی اختیار کیے ہوئے ہیں۔ اس کا مقصد، بظاہر، یہ ہے کہ خطے میں ماحول کو زیادہ کشیدہ ہونے سے روکا جائے۔اقوام متحدہ کے علاوہ امریکا، برطانیہ اور چین نے ایران اور اسرائیل پر زور دیا ہے کہ زیادہ سے زیادہ ضبط و تحمل کا مظاہرہ کریں تاکہ مشرقِ وسطیٰ کی صورتِ حال مکمل جنگ کی طرف نہ جائے۔ایران کے وزیر خارجہ حسین امیر عبداللہیان نے کہا ہے کہ اگر اسرائیل نے ایرانی مفادات کو نقصان پہنچایا تو فوری اور بھرپور جواب دیا جائے گا۔یاد رہے کہ گزشتہ روز ایران کے شہر اصفہان کے ایئر پورٹ کے نزدیک دھماکے سُنے گئے تھے۔ ایرانی حکام نے ان دھماکوں کے لیے اسرائیل کو موردِ الزام ٹھہراتے ہوئے کہا تھا کہ مناسب وقت پر اس کا بھرپور جواب دیا جائے گا کیونکہ اس حملے میں اسرائیل کے ملوث ہونے کو ثابت کرنے والا ایک لِنک ملا ہے۔ اس حملے کو اسرائیل اور ایران دونوں ہی نے لو پروفائل میں رکھنے کی کوشش کی تھی تاکہ صورتِ حال زیادہ کشیدہ نہ ہو۔ایرانی وزیر خارجہ نے یہ بھی کہا تھا کہ ایران کی فضائی حدود سے پرواز شروع کرنے والے چند چھوٹے، کھلونا نما ڈرونز کو ایرانی فوج نے مار گرایا تھا۔ ان ڈرونز سے کوئی نقصان نہیں ہوا