بیلٹ پیپر کے سائز کو کم کرنے کا فیصلہ

الیکشن کمیشن آف پاکستان نے بیلٹ پیپر کے سائز کو کم کرنے کا فیصلہ کر لیا۔بیلٹ پیپرز کی دوبارہ چھپائی کے معاملے پر الیکشن کمیشن کا اجلاس منعقد ہوا جس میں فیصلہ کیا گیا ہے کہ جن حلقوں میں بیلٹ پیپرز کی دوبارہ چھپائی کرانا پڑ رہی ان کو آخر میں چھاپا جائے گا۔اجلاس کے اعلامیے کے مطابق بیلٹ پیپرز کی دوبارہ چھپائی خصوصی سیکیورٹی کاغذ اور وقت کی دستیابی پر منحصر ہو گی۔اعلامیے میں الیکشن کمیشن نے کہا ہے کہ اس وقت انتخابات کے لیے بیلٹ پیپرز کی چھپائی جاری ہے، جن کی عدالتی فیصلوں پر کئی حلقوں میں چھپائی دوبارہ کرنا پڑ رہی ہے۔الیکشن کمیشن کے اعلامیے کےمیں کہا گیا ہے کہ دوبارہ چھپائی کے لیے سیکیورٹی کاغذ کی دستیابی اور بر وقت چھپائی بڑا چیلنج ہے۔اعلامیے کے مطابق 2018ء میں بیلٹ پیپرز کی چھپائی میں 800 ٹن خصوصی سیکیورٹی کاغذ استعمال ہوا، جبکہ 2024ء میں امیدواروں کی کثیر تعداد پر 2400 ٹن خصوصی سیکیورٹی کاغذ درکار تھا۔الیکشن کمیشن کے اعلامیے میں کہا گیا ہے کہ صورتِ حال کی سنگینی کے باعث بیلٹ پیپر کے سائز کو کم کرنے کا فیصلہ کیا گیا ہے۔اعلامیے میں کہا گیا ہے کہ بیلٹ پیپر کا سائز کم کرنے سے سیکیورٹی کاغذ کی ضرورت 2170 ٹن رہ گئی ہے، یہ تعداد محض ایک دفعہ بیلٹ پیپر کی چھپائی کے لیے بمشکل کافی ہے۔الیکشن کمیشن کا اپنے اعلامیے میں یہ بھی کہنا ہے کہ کئی حلقوں کے لیے بیلٹ پیپرز کی دوبارہ چھپائی الیکشن کمیشن کے لیے ایک بڑا چیلنج ہے