سانحہ 9مئی : 12 پولیس افسران کی عمران خان سے اڈیالہ جیل میں تفتیش

سانحہ 9مئی کے مقدمات میں سابق چیئرمین پاکستان تحریک انصاف (پی ٹی آئی) سے تفتیشی ٹیم نے ڈھائی گھنٹے تک تفتیش کی۔راولپنڈی پولیس نے سابق چیئرمین پی ٹی آئی کو 9 مئی کے 12 مقدمات میں شامل تفتیش کر لیا۔جیل ذرائع کا کہنا ہے کہ اڈیالہ جیل میں 12 تفتیشی افسران پر مشتمل ٹیم نے عمران خان سے تفتیش کی۔انسداد دہشت گردی عدالت نے پولیس کو سابق چیئرمین پی ٹی آئی سے 2 روزہ تفتیش کی اجازت دے رکھی ہے، عمران خان سے 9 مئی کے 12 مقدمات کی تفتیش کا سلسلہ کل تک جاری رہے گا۔یاد رہے کہ گزشتہ روز سابق چیئرمین پی ٹی آئی عمران خان کی جی ایچ کیو حملہ کیس میں گرفتاری ڈال دی گئی تھی۔جی ایچ کیو حملہ کیس کی سماعت انسداد دہشت گردی کی عدالت کے جج ملک اعجاز آصف نے کی، جس میں عمران خان ویڈیو لنک کے ذریعے عدالت میں پیش ہوئے تھے جبکہ تمام 12 مقدمات کے ایس ایچ اوز ریکارڈ سمیت کمرۂ عدالت میں پیش ہوئے تھے۔عدالت نے جی ایچ کیو حملہ کیس میں بانی پی ٹی آئی کے ریمانڈ کی استدعا خارج کرتے ہوئے عمران خان سے 9 مئی کے مقدمات کی تفتیش اڈیالہ جیل میں ہی کرنے کی ہدایت کی تھی