عمران خان جی ایچ کیو حملہ کیس میں باقاعدہ گرفتار

سابق چیئرمین پی ٹی آئی عمران خان کی جی ایچ کیو حملہ کیس میں گرفتاری ڈال دی گئی۔جی ایچ کیو حملہ کیس کی سماعت انسداد دہشت گردی کی عدالت کے جج ملک اعجاز آصف نے کی۔سابق چیئرمین پی ٹی آئی ویڈیو لنک کے ذریعے عدالت میں پیش ہوئے جبکہ تمام 12 مقدمات کے ایس ایچ اوز ریکارڈ سمیت کمرۂ عدالت میں پیش ہوئے۔عدالت نے جی ایچ کیو حملہ کیس میں سابق چیئرمین پی ٹی آئی کے ریمانڈ کی استدعا خارج کرتے ہوئے عمران خان سے 9 مئی کے مقدمات کی تفتیش اڈیالہ جیل میں ہی کرنے کی ہدایت کر دی۔واضح رہے کہ بانی پی ٹی آئی اس وقت اڈیالہ جیل میں توشہ خانہ اور 190 ملین پاؤنڈز کیس میں قید ہیں۔گزشتہ روز آفیشل سیکرٹ ایکٹ عدالت میں سابق چیئرمین پاکستان تحریک انصاف (پی ٹی آئی) کے سائفر کیس میں ضمانتی مچلکے جمع کروا ئے گئے تھے۔سائفر کیس میں بانی پی ٹی آئی کی درخواست ضمانت سپریم کورٹ نے منظور کی تھی۔اس کیس میں عمران خان اور شاہ محمود قریشی جوڈیشل ریمانڈ پر راولپنڈی کی اڈیالہ جیل میں قید ہیں۔کیس کی ابتدائی سماعت اٹک جیل میں ہوئی تھی جس کے بعد انہیں اسلام آباد ہائی کورٹ کے احکامات پر اڈیالہ جیل منتقل کیا گیا تھا