جیلوں سے رہائی کے بعد چیئرمین پی ٹی آئی سے ملنے والے 27 کارکن گرفتار

رہائی کے بعد چیئرمین پی ٹی آئی سے ملنے والے 27 کارکنوں کو لاہور پولیس نے گرفتار کر کے نامعلوم مقام پر منتقل کر دیا۔سانحہ 9مئی کے واقعات میں ملوث شرپسندوں کی عدالتی مداخلت پر رہائی ممکن ہوئی تاہم پنجاب کے مختلف اضلاع سے پی ٹی آئی کارکن جیلوں سے رہائی کے بعد چیئرمین سے ملنے زمان پارک پہنچے تھے۔کارکنوں کا تعلق ضلع قصور، لاہور، گوجرانوالا اور سرگودھا سے ہے، کارکن ملاقات کے بعد واپس جانے لگے تو مختلف علاقوں میں لگے ناکوں پر پولیس نے انہیں گرفتار کر لیا۔گرفتار کارکنوں کی فہرست کے مطابق گرفتار کارکنوں میں زیادہ تر کا تعلق ضلع قصور، لاہور، گوجرانوالا اور سرگودھا سے ہے۔پولیس ذرائع کے مطابق گرفتار کارکنوں کو ابھی تک کسی مقدمے میں نامزد نہیں کیا گیا ہے۔خیال رہے کہ رواں ماہ کے آغاز میں لاہور ہائی کورٹ نے لاہور سمیت پنجاب کے 11 اضلاع میں تحریک انصاف کے کارکنوں کی نظر بندی کالعدم قرار دیتے ہوئے تمام افراد کو فوری طور پر رہا کرنے کا حکم دیا تھا۔جسٹس صفدر سلیم شاہد نے درخواستوں پر 9 صفحات پر مشتمل تحریری فیصلہ جاری کیا تھا۔دوسری جانب سندھ حکومت نے بھی تحریک انصاف کے کارکنوں سمیت 30 نظربند شہریوں کو مختلف جیلوں سے رہا کردیا تھا