روس کا بیلاروس کیساتھ جوہری ہتھیار رکھنے کا معاہدہ خطرناک قرار

یورپی یونین اور نیٹو نے روس کے بیلاروس کے ساتھ جوہری ہتھیار رکھنے کے معاہدے کو خطرناک اور اشتعال انگیز قرار دے دیا۔گزشتہ روز روسی صدر ولادیمیر پیوٹن نے بیلاروس میں اپنے جوہری ہتھیار رکھنے کا معاہدہ ہونے کا اعلان کیا۔روس کے بیلاروس کی سرزمین پر جوہری ہتھیار رکھنے کے معاہدے پر ردعمل دیتے ہوئے یورپی یونین خارجہ پالیسی کے چیف جوزف بورل کا کہنا ہے کہ بیلاروس کا روسی جوہری ہتھیاروں کی میزبانی کرنا یورپی سلامتی کے لیے خطرہ ہے۔انہوں نے کہاکہ بیلاروس کو اختیار ہے کہ وہ روسی جوہری ہتھیاروں کی میزبانی نہ کرے،یورپی یونین مزید پابندیاں لگانے کے لیے تیار ہے۔یورپی یونین کا کہنا ہے کہ بیلاروس کا روسی جوہری ہتھیاروں کی میزبانی کرنا غیرذمہ دارانہ اشتعال انگیزی ہوگا، بیلاروس ایسا نہ کرے بصورت دیگر یورپی یونین پابندیاں لگانے کے لیے تیار ہیں، نیٹو کا کہنا ہے کہ ہم نے صورتحال پر گہری نظر رکھی ہوئی ہے، روس کی جوہری حالت میں ابھی ایسی کوئی تبدیلی نہیں دیکھی جس پر ہمیں تیاری کی ضرورت ہو۔ترجمان کا کہنا تھا کہ نیٹو کے جوہری ہتھیار اشتراک کا روسی حوالہ مکمل طور پر گمراہ کُن ہے، نیٹو کے اتحادی بین الاقوامی وعدوں پر پورے احترام کے ساتھ عمل کرتے ہیں، روس نے ہی اپنے ہتھیاروں کے کنٹرول کے وعدوں کو مسلسل توڑا ہے۔