عمران خان کا بھانجا حسان نیازی راہداری ریمانڈ پر کوئٹہ پولیس کے حوالے

عمران خان کے بھانجے اور فوکل پرسن پی ٹی آئی حسان خان نیازی کو ایک روزہ راہداری ریمانڈ پر کوئٹہ پولیس کے حوالے کر دیا گیا۔جوڈیشل مجسٹریٹ مرید عباس نے حسان خان نیازی کو ایک روزہ راہداری ریمانڈ پر کوئٹہ پولیس کے حوالے کیا۔کوئٹہ پولیس نے حسان خان نیازی کو کوئٹہ کے جوڈیشل مجسٹریٹ کے سامنے پیش کرنے کے لیے راہداری ریمانڈ کی استدعا کی تھی جس کو منظور کرتے ہوئے عدالت نے ریمارکس دیئے کہ حسان نیازی کے ایک روزہ راہداری ریمانڈ کو منظور کیا جاتا ہے۔عدالت نے حکم دیا کہ حسان خان نیازی کو تفتیشی افسر متعلقہ عدالت میں 25 مارچ کو پیش کرے، بعدازاں کوئٹہ پولیس اسلام آباد کچہری سے حسان خان نیازی کو لے کر کوئٹہ روانہ ہو گئی۔یاد رہے کہ حسان خان نیازی کے راہداری ریمانڈ کے لیے کوئٹہ پولیس آج اسلام آباد کچہری پہنچی تھی، 18مارچ کو عمران خان کے بھانجے اور فوکل پرسن کے خلاف تھانہ ائیرپورٹ کوئٹہ میں مقدمہ درج کیا گیا تھا