ہیلووین کی خوفناک تقریب جنوبی کورین کے لیے خوفناک بن گئی، ہلاکتوں کی تعداد 151 ہوگئی

جنوبی کوریاکے دارالحکومت سیئول کی تنگ گلیوں میں ہیلووین کی تقریب میں بھگدڑ سے ہلاکتوں کی تعداد 151 ہوگئی جبکہ 150 سے زائد افراد زخمی ہوگئے۔

جنوبی کورین حکام کے مطابق دارالحکومت سیئول میں ہیلووین منانے والے ہزاروں لوگوں کے تنگ گلیوں میں جمع ہونے سے بھگدڑ مچی جس کے نتیجے میں 151 افراد ہلاک جبکہ 150سے زائد افراد زخمی ہوگئے۔برطانوی میڈیا کے مطابق زخمیوں میں غیرملکی بھی شامل ہیں، حادثے کے مقام پر امدادی سرگرمیاں جاری ہیں، حادثے کی اصل وجہ جاننے کیلئے تحقیقات جاری ہیں۔

حکام کے مطابق بھگدڑ سے بیشتر متاثرہ افراد کو موقع پر ہی دل کے دورے کی طبی امداد دی گئی جس کے بعد انہیں اسپتال منتقل کیا گیا۔مقامی حکام کی جانب سے ہلاکتوں میں اضافے کا خدشہ بھی ظاہر کیا گیا ہے، دوسری جانب جنوبی کورین صدر نے واقعے کے حوالے سے ہنگامی میٹنگ طلب کرلی ہےسیئول میں کورونا وائرس کی پابندیاں ختم ہونے کے بعد گھروں سے باہر پہلا ہیلووین منایا جا رہا تھا اور اندازے کے مطابق جائے حادثہ پر ایک لاکھ سے زائد افراد موجود تھے۔واضح رہے کہ ہیلووین ایک مغربی تہوار ہے جو کہ یورپ اور امریکا سمیت بہت سے مشرقی ممالک میں بھی اکتوبر کے آخر میں منایا جاتا ہے۔اس رات اندھیرا چھانے پر بچے اور بڑے خوفناک دکھنے والے ملبوسات پہن کر دوسروں کو ڈرانے کیلئے نکل کھڑے ہوتے ہیں