کراچی : 8، 9 اور 10 محرم الحرام کے مرکزی جلوسوں کے راستے سیل، ٹریفک پلان جاری

کراچی میں 8، 9 اور 10 محرم الحرام کے مرکزی جلوسوں کے راستوں کو کنٹینر لگاکر سیل کردیا گیا جبکہ اس حوالے سے ٹریفک پلان جاری کردیا گیا۔کراچی میں 8 محرم کے جلوس کی گزرگاہ کے اطراف گلیوں اور راستوں کو سیل کردیا گیا جبکہ ایم اے جناح روڈ، کوریڈور تھری اور صدر کے مختلف مقامات پر کنٹینر رکھ کر راستے بند کر دیے گئے۔کراچی میں آج سے 10 محرم الحرام تک اورنج لائن اور گرین لائن بس سروس معطل رہے گی، دوسری جانب کراچی میں عوام کی سہولت کے لیے 8، 9 اور 10 محرم الحرام کے جلوس کے لیے ٹریفک پلان جاری کر دیا گیا اور جلوس کی وجہ سے ایم اے جناح روڈ گرومندر سے ٹاور تک بند ہو گا۔ڈی آئی جی ٹریفک کے ترجمان کی جانب سے جاری بیان میں کہا گیا کہ 8، 9 اور 10 محرم الحرام کو سیکیورٹی وجوہات کی بنا پر کراچی کا ایم اے جناح روڈ گرومندر سے ٹاور تک بند رہے گا جبکہ نیو ایم جناح روڈ، پریڈ اسٹریٹ سے بھی جلوس کے سوا کسی اور گاڑی کو جانے کی اجازت نہیں ہو گی۔ان تینوں دن مرکزی جلوس نشتر پارک سے روانہ ہو گا اور اپنے روایتی مقررہ راستوں سے ہوتا ہوا حسینیہ ایرانیاں امام بارگاہ پر پہنچ کر اختتام پذیر ہو گا۔کسی کو بھی جلوس کے روٹ پر گاڑی کھڑی کرنی کی اجازت نہیں ہو گی اور صرف ان گاڑیوں کو جلوس میں داخلے کی اجازت ہو گی جن کی ونڈ اسکرین پر جلوس میں شامل ہونے کا اسٹیکر چسپاں ہو گا۔جلوس میں شامل ہونے کے لیے اسٹیکر والی گاڑیوں کو براستہ شاہراہ قائدین سوسائٹی لائٹ سگنل سے داخلے کی اجازت ہو گی۔ٹریفک پولیس کی جانب سے جاری متبادل راستوں کا اعلان کرتے ہوئے کہا گیا کہ ناظم آباد سے آنے والے افراد لسبیلہ چوک سے نشتر روڈ کی جانب گارڈن سے ہوتے ہوئے منزل کی جانب جا سکتے ہیں۔لیاقت آباد سے آنے والے افراد تین ہٹی سے لسبیلہ چوک اور بائیں جانب مُڑ کر سینٹرل جیل(مارٹن روڈ) کی جانب جا سکتے ہیں۔حسن اسکوائر سے پی پی چورنگی جانے والے افراد کشمیر روڈ سے سوسائٹی لائٹ سگنل(شاہراہ قائدین) اور جیل فلائی اوور تین ہٹی سے نشتر روڈ(لسبیلہ چوک) جاسکتے ہیں۔محرم الحرام: ملک بھر کے شعلہ بیان مقررینشاہراہ فیصل سے شاہراہ قائدین(نورانی کباب) سے نمائش جانے والے افراد سوسائٹی لائٹ سگنل سے دائیں جانب کشمیر روڈ سے اپنی منزل کی جانب رواں دواں ہو سکتے ہیں۔سینٹرل جیل گیٹ(جمشید روڈ) سے گرومندر، ایم اے جناح روڈ کی جانب جانے والے افراد گرومندر سے بہاردر یار جنگ روڈ، سولجر بازار سے اپنی منزل کی جانب جا سکتے ہیں۔گارڈن چڑیا گھر سے ایم اے جناح روڈ جانے والے افراد انکل سریا سے دائیں جانب گل پلازہ اور بائیں جانب کوسٹ گارڈ ہولی فیملی ہسپتال سے اپنی مطلوبہ منزل پر پہنچ سکتے ہیں۔ٹریفک پولیس کی جانب سے ٹرک اور ٹرالر سمیت ہیوی ٹریفک کے لیے بھی متبادل راستوں کا اعلان کیا گیا ہے جس میں کہا گیا کہ سپر ہائی وے سے ایم اے جناح روڈ کی طرف جانے والا تمام ہیوی/کمرشل ٹریفک لیاقت آباد نمبر10 سے ناظم آباد چورنگی نمبر2 کی طرف موڑ دیا جائے گا جو براستہ حبیب بینک فلائی اوور شیرشاہ سے ماڑی پور تک جاسکے گا اور یہی راستہ واپسی کے لیے بھی اختیار کیا جائے گا۔نیشنل ہائی وے سے شہر کی طرف جانے والے تمام ہیوی/ کمرشل ٹریفک کو براستہ شاہراہ فیصل یا راشد منہاس روڈ، اسٹیڈیم روڈ، سر شاہ سلیمان روڈ، حسن اسکوائر، لیاقت آباد نمبر 10، ناظم آباد چورنگی نمبر2، حبیب بینک فلائی اوور کے راستے شیرشاہ سے ماڑی پور تک آنے کی اجازت ہو گی اور واپسی کے لیے یہی راستہ اختیا کیا جائے گا۔کسی بھی قسم کی چھوٹی یا بڑی ٹریفک کو گرومندر چوک سے آگے جلوس کے روٹ پر جانے کی اجازت نہیں ہو گی اور اس تمام ٹریفک کو بہادر یار جنگ روڈ، سولجر بازار کی طرف موڑ دیا جائے گا۔