بیٹنگ، بولنگ ٹھس: ایشیا کپ کے بڑے مقابلے میں پاکستان کو بھارت کے ہاتھوں شکست

ایشیا کپ ٹی 20 ٹورنامنٹ کے بڑے مقابلے میں بھارت نے پاکستان کو 7 وکٹوں سے شکست دیدی۔دبئی انٹرنیشنل کرکٹ سٹیڈیم میں کھیلے جانیوالے ایونٹ کے چھٹے میچ میں پاکستان کرکٹ ٹیم کے کپتان سلمان علی آغا نے بھارت کیخلاف ٹاس جیت کر پہلے بیٹنگ کو ترجیح دی، تاہم پہلے بیٹنگ کرتے ہوئے پاکستان نے مقررہ 20 اوورز میں 9 وکٹوں کے نقصان پر 127 رنز بنائے۔پاکستان کی جانب سے اننگز کا آغاز صائم ایوب اور صاحبزادہ فرحان نے کیا تاہم یہ جوڑی ٹیم کو اچھا آغاز فراہم نہ کرسکی اور اوپنر بلے باز صائم ایوب بغیر کھاتہ کھولے ہی ہاردک پانڈیا کی گیند پر بمراہ کے ہاتھوں کیچ تھما بیٹھے، پاکستان کا دوسرا نقصان 6 رنز کے مجموعی سکور پر ہوا جب محمد حارث جسپریت بمراہ کی گیند پر پانڈیا کے ہاتھوں کیچ آؤٹ ہو گئے۔پاکستان کی تیسری وکٹ 45 کے مجموعی سکور پر گری جب فخر زمان 17 رنز آؤٹ ہوگئے جبکہ 49 رنز کے مجموعے پر کپتان سلمان علی آغا بھی محض 3 رنز بناکر اکشر پٹیل کی گیند پر ابیشیک شرما کو کیچ تھما بیٹھے۔نئے آنے والے بلے باز حسن نواز بھی کریز پر کچھ دیر کے ہی مہمان ثابت ہوئے اور صرف 7 گیندوں پر 5 رنز بنا کر کلدیپ یادو کی گیند پر کیچ تھما بیٹھے جبکہ محمد نواز بغیر کھاتہ کھولے ہی پویلین لوٹ گئے۔پاکستان کی آٹھویں وکٹ 97 رنز پر گری جب فہیم اشرف 11 رنز بنا کر ورون چکرورتھی کی گیند پر ایل بی ڈبلیو آؤٹ ہوئے جبکہ پاکستان کا نواں نقصان 111 رنز پر ہوا، سفیان مقیم 10 رنز بنا کر بمراہ کا شکار بنے۔پاکستان کی جانب سے شاہین شاہ آفریدی نے جارحانہ کھیل پیش کیا اور 16 گیندوں پر 4 چھکوں کی مدد سے 33 رنز کی ناٹ آؤٹ اننگز کھیلی۔بھارت کی جانب سے کلدیپ یادو نے 3، اکشر پٹیل اور جسپریت بمراہ نے 2،2 جبکہ ہاردک پانڈیا اور ورون چکرورتھی نے ایک ایک وکٹ حاصل کی۔