بالاج قتل کیس کے مرکزی ملزم طیفی بٹ کی گرفتاری کی اندرونی کہانی سامنے آگئی

دبئی میں طیفی بٹ گرفتار: بالاج قتل کیس کے مرکزی ملزم کی گرفتاری کی اندرونی کہانی سامنے آگئی، بالاج قتل کیس کے مرکزی ملزم طیفی بٹ کی گرفتاری کی تفصیلات سامنے آگئی ہیں۔ پولیس کے مطابق ملزم کو دبئی میں ایک دعوت کے دوران گرفتار کیا گیا، جہاں پاکستان پولیس کے ایکسٹراڈیشن سیل کے ڈی ایس پی خالد وریا پہلے سے موجود تھے۔

پولیس ذرائع کے مطابق ڈی ایس پی خالد وریا دو اشتہاری ملزمان کی گرفتاری کے لیے دبئی گئے تھے، جہاں دبئی پولیس کے تعاون سے کارروائی کی گئی۔ کارروائی کے دوران طیفی بٹ بھی اسی فلیٹ میں موجود تھا جہاں دعوت جاری تھی، جس پر اسے حراست میں لے لیا گیا۔ذرائع کا کہنا ہے کہ طیفی بٹ اس وقت دبئی پولیس کی حراست میں ہے جبکہ اس کی ریڈ وارنٹ کے تحت پاکستان حوالگی کا عمل شروع کر دیا گیا ہے۔یاد رہے کہ 19 فروری 2024 کو لاہور کے ٹھوکر نیاز بیگ کے قریب ایک نجی شادی کی تقریب میں ٹیپو ٹرکاں والا کے بیٹے امیر بالاج ٹیپو کو فائرنگ کر کے قتل کیا گیا تھا۔ اس واردات کا مرکزی ملزم طیفی بٹ طویل عرصے سے مفرور تھا۔