ایلون مسک نےٹوئٹر ملازمین کی ڈیوٹی میں اضافہ کردیا ،متعدد ملازمت سے فارغ

ٹویٹر کے نئے باس ایلون مسک نے ٹوئٹر کا نظام سنبھالتے ہی ملازمین کی زندگی اجیرن کردی، ایسا ہم نہیں ٹوئٹر ملازمین کہہ رہے ہیں، جو اپنے نئے سربراہ کے سخت فیصلوں سے پریشان دکھائی دے رہےہیں۔ٹوئٹر کی نئے سربراہ نے ٹوئٹر خریدتے ہی بلو ٹک پر فیس عائد کردی ہے، ٹوئٹر کے کئی ملازمین کو نوکری سے برطرف کرکے ٹیسلا کے ملازمین کو بھرتی کرلیا ہے۔وہیں اب یہ خبریں گردش کر رہی ہیں کہ موجودہ ملازمین کے لیے ڈیوٹی کے اوقات 8 گھنٹوں سے بڑھا کر 12 گھنٹے اور ہفتے کے ساتوں دن کردیئے ہیں۔

غیر ملکی میڈیا رپورٹس کے مطابق ایلون مسک کی سخت ڈیڈ لائن کو پورا کرنے کے لیے ٹوئٹر کے کچھ انجینئرز سے مطالبہ کیا گیا ہے کہ وہ پورے ہفتے بِلا ناغہ کام پر آئیں اور 8 گھنٹوں کی بجائے 12 گھنٹے ادارے کو دیں۔ اضافی گھنٹے کام کرنے کے لیے ملازمین سے نہ ان کی مرضی معلوم کی گئی ، نہ سیکیورٹی کا بتایا گیا اور نہ ہی انہیں اوور ٹائم کے حوالے سے آگاہ کیا گیا۔ ملازمین کا کہنا ہے کہ نومبر کے آغاز کے ساتھ ہی انہیں یہ نوٹس دیا گیا اور انتباہ دیا گیا کہ اگر ڈیڈ لائن وقت پر پوری نہ ہوئی تو انہیں ملازمت سے برطرف کر دیا جائے گا۔ان کا یہ بھی کہنا ہے کہ انہیں مخصوص ٹاسک مکمل کرنے کے لیے 7 نومبر تک کا وقت دیا گیا ہے، ان ٹاسک میں بلو ٹک سبسکرپشن فیس کا لاگو ہونا بھی شامل ہےایلون مسک کی جانب سے سخت ڈیڈ لائن کو وقت پر مکمل کرنے کی خاطر ٹوئٹر کے دفتری اوقات بڑھانے کے بعد بیشتر ملازمین دفتر میں ہی قیام کرنے لگے۔مائیکرو بلاگنگ سائٹ ٹوئٹر میں کام کرنے والے ’ایوان‘ نامی سوشل میڈیا صارف نے اپنے مینجر کی دفتر کے فرش پر سوتے ہوئے ایک تصویر ٹوئٹر پو شیئر کی جو وائرل ہوگئی۔اس تصویر میں ٹوئٹر کی ڈائریکٹر پروڈکٹ مینجمنٹ ایستھر کرافورڈ کو دیکھا جاسکتا ہے جو سلیپنگ بیگ میں آنکھوں پر ماسک چڑھائے میز اور کرسیوں کے عقب میں سو رہی ہیں۔وائرل ہونے والی اس تصویر کے کیپشن میں ایوان نے لکھا کہ ’جب آپ کو ایلون کے ٹوئٹر میں اپنے باس سے کسی چیز کی ضرورت ہو‘