موجودہ حکومت 18 ماہ تک برقرا ر ہے گی، فچ کی پیشگوئی

معاشی درجہ بندی کے ادارے فچ نے پاکستان سے متعلق اپنی رپورٹ میں پیش گوئی کی ہے کہ موجودہ حکومت 18 ماہ تک برقرا ر ہے گی۔ جب کہ بانی پی ٹی آئی عمران خان مستقبل قریب میں زیر حراست ہی رہیں گے۔ موجودہ حکومت ختم ہوئی تو پاکستان میں ٹیکنوکریٹ کی حکومت آسکتی ہے۔فچ بزنس مانیٹر انٹرنیشنل نے پاکستان کنٹری رسک رپورٹ جاری کر دی ہے جس میں بتایا گیا ہے کہ پاکستان کی معاشی بحالی کو نازک صورتحال کا سامنا ہے جبکہ سیاسی صورت حال معیشت کو ڈی ریل کر سکتی ہے۔ موجودہ حکومت آئندہ 18 مہینے یا اس سے آگے تک اقتدار میں رہے گی اور حکومت تبدیل ہوئی تو ملک میں نئے انتخابات نہیں ہوں گے۔ حکومت ختم ہونے پر پاکستان میں ٹیکنوکریٹ کی حکومت آسکتی ہے۔فچ نے اپنی رپورٹ میں مزید کہا کہ فروری کے الیکشن میں جیل میں قید عمران خان کے حمایت یافتہ آزاد امیدواروں کو بڑی کامیابی ملی، جب کہ پاکستان کے شہروں میں مظاہرے معاشی سرگرمیاں متاثر کر سکتے ہیںرپورٹ میں کہا گیا کہ پاکستان کی معیشت کے لیے بیرونی ادائیگیوں کا دباؤ معاشی رسک ہے، جب کہ زراعت کے لیے سیلاب اور خشک سالی معاشی رسک ہے۔ موجودہ حکومت آئی ایم ایف کے ساتھ مل کر ساری معاشی اصلاحات کرے گی۔فچ کے مطابق حکومت پاکستان کے مشکل معاشی فیصلےآئی ایم ایف کےساتھ پروگرام کی راہ ہموارکررہے ہیں، رواں مالی سال کے اختتام تک پاکستان میں مہنگائی بڑھنے کی شرح کم ہوسکتی ہے اور رواں مالی سال کے اختتام تک اسٹیٹ بینک آف پاکستان سے شرح سود میں کمی کی توقع ہے۔فچ کا کہنا ہے کہ رواں مالی سال کے اختتام تک توقع ہے کہ اسٹیٹ بینک شرح سود کو 14فیصد لائے، حکومت پاکستان نے بجٹ میں مشکل ترین معاشی اہداف مقرر کیے ہیں، حکومت پاکستان مالیاتی خسارہ 7.4 سےکم کرکے 6.7 فیصد پر لانا چاہتی ہے۔فچ نے اپنی رپورٹ میں موجودہ سال کے اختتام تک ڈالر 290 روپے جبکہ 2025 میں 310 روپے تک جانے کی پیشگوئی کی ہے جبکہ آئی ایم ایف پروگرام کے تحت بجٹ اہداف کا حصول مشکل قرار دیا گیا ہے۔