عمران خان سے جیل میں ملاقات بارےکیسز لارجر بینچ میں سماعت کیلئے مقرر

بانی پی ٹی آئی عمران خان سے اڈیالہ جیل میں ملاقات سے متعلق تمام کیسز کل لارجر بینچ میں سماعت کے لیے مقرر ہو گئے۔وزیر اعلیٰ خیبرپختونخوا سہیل آفریدی کی عمران خان سے ملاقات کی درخواست بھی کل لارجر بینچ میں سماعت کے لیے مقرر ہو گئی۔اسلام آباد ہائی کورٹ کے چیف جسٹس سرفراز ڈوگر، جسٹس ارباب محمد طاہر اور جسٹس اعظم خان لارجر بینچ میں شامل ہیں۔قیدی عرفان کی بانی پی ٹی آئی عمران خان جیسی جیل سہولیات فراہم کرنے کی درخواست بھی کل لارجر بینچ میں سماعت کے لیے مقرر کی گئی ہے۔عدالتی حکم کے باوجود بانی سے ملاقات نہ کروانے پر توہین عدالت کیس بھی کل لارجر میں مقرر ہو گیا۔واضح رہے کہ شبلی فراز، علیمہ خان، سلمان اکرم راجہ و دیگر نے ملاقات نہ کروانے پر توہین عدالت کی درخواستیں دائر کر رکھی ہیں۔جیل ملاقات ، جیل رولز اور ایس او پیز سے متعلق بھی درخواستیں اور سپرنٹنڈنٹ اڈیالہ جیل، پنجاب حکومت کے جیل ملاقات سے متعلق کیسز بھی کل لارجر بینچ میں سماعت کے لیے مقرر ہو گئے ہیں۔