علامہ اقبال کا یومِ ولادت، مزار پر گارڈز کی تبدیلی

لاہور میں شاعرِ مشرق علامہ محمد اقبال کے مزار پر گارڈز کی تبدیلی کی پُروقار تقریب منعقد ہوئی۔علامہ محمد اقبال کے 146ویں یومِ پیدائش پر آج پاک بحریہ کے دستے نے مزارِ اقبال کے اعزازی گارڈز کے فرائض سنبھال لیے۔تقریب کے مہمانِ خصوصی اسٹیشن کمانڈر پاکستان نیوی لاہور کموڈور ساجد حسین نے سربراہ پاک بحریہ کی جانب سے مزارِ اقبال پر پھول چڑھائے۔کموڈور ساجد حسین نے مزارِ اقبال پر فاتحہ خوانی کی اور مہمانوں کی کتاب میں تاثرات بھی قلم بند کیے۔ گورنر پنجاب محمد بلیغ الرحمٰن نے بھی علامہ اقبال کے یومِ ولادت کے موقع پر لاہور میں مزارِ اقبال پر حاضری دے کر فاتحہ خوانی کی اور پھول رکھے۔

گورنر پنجاب نے مہمانوں کی کتاب میں اپنے تاثرات بھی قلم بند کیے۔جی او سی لاہور میجر جنرل محمد شجاع انور اور ڈی جی رینجرز پنجاب میجر جنرل محمد قذافی نے بھی مزارِ اقبال پر حاضری دی۔نگراں وزیرِ اطلاعات پنجاب عامر میر، آئی جی جیل خانہ جات پنجاب فاروق نذیر اور وائس چانسلر کنگ ایڈورڈ میڈیکل یونیورسٹی پروفیسر محمود ایاز نے بھی مزارِ اقبال پر حاضری دی۔علاوہ ازیں آج صبح لاہور میں شاعر مشرق علامہ محمد اقبال کے مزار پر گارڈز کی تبدیلی کی پُروقار تقریب ہوئی، یومِ اقبال کے حوالے سے آج ملک بھر میں تقریبات بھی منعقد کی جا رہی ہیں۔اس موقع پر حکومت نے ملک بھر میں عام تعطیل کا اعلان کر رکھا ہے