خان یونس: اسرائیلی فوج کے حملے میں بچوں سمیت ایک ہی خاندان کے 11 افراد شہید

اسرائیلی فوج کی مظلوم فلسطینیوں پر مسلسل بمباری جاری ہے، خان یونس میں 1 گھر پر بم باری سے بچوں سمیت 1 ہی خاندان کے 11 افراد شہید ہو گئے۔فلسطینی میڈیا کے مطابق جمعے کی صبح جنوبی غزہ کی پٹی کے شہر خان یونس کے علاقے عبسان الجدیدہ میں اسرائیلی فضائی حملے نے ایک گھر کو نشانہ بنایا، جس کے نتیجے میں کم از کم 11 افراد شہید ہو گئے جن میں زیادہ تر بچے شامل تھے۔مقامی ذرائع کے مطابق حملہ اتنا شدید تھا کہ اس نے کم از کم 2 خاندانوں کو مکمل طور پر ختم کر دیادوسری جانب اسرائیل کی جانب سے محدود امداد کی فراہمی کے باعث غزہ میں انسانی بحران بدترین شکل اختیار کر گیا ہے، جہاں اقوامِ متحدہ کے مطابق 70 ہزار سے زائد بچے شدید غذائی قلت کا شکار ہو چکے ہیں۔غزہ کی وزارتِ صحت کے مطابق گزشتہ 24 گھنٹوں کے دوران مختلف اسپتالوں میں کم از کم 79 لاشیں لائی گئیں جبکہ 211 فلسطینی زخمی ہوئے۔جبالیا پناہ گزین کیمپ میں 1 گھر پر اسرائیلی بم باری کے عینی شاہدین نے الجزیرہ کو بتایا کہ حملے میں تقریباً 50 افراد جاں بحق یا لاپتہ ہو گئےغزہ کی وزارتِ صحت کے تازہ ترین اعداد و شمار کے مطابق، 7 اکتوبر 2023ء کے بعد سے اب تک کم از کم 53 ہزار 901 فلسطینی شہید اور 1 لاکھ 22 ہزار 593 زخمی ہو چکے ہیں۔حکومت کے میڈیا دفتر نے شہادتوں کی مجموعی تعداد 61 ہزار 700 سے زائد بتائی ہے، جس میں ملبے تلے دبے ہزاروں افراد کو بھی مردہ قرار دیا گیا ہے