ٹرمپ کا ملائیشیا جاتے دوحہ میں مختصر قیام، قطری حکام سے جہاز میں ملاقات

امریکی صدر ڈونلڈ ٹرمپ نے ملائیشیا کے دورے پر جاتے ہوئے قطر میں مختصر قیام کیا اور جہاز میں ہی امیر قطر اور وزیراعظم سے ملاقات کی۔امریکی صدر ڈونلڈ ٹرمپ اس وقت ملائیشیا کے دورے پر ہیں تاہم راستے میں ان کے طیارے نے قطر میں لینڈ کر لیا، امریکی صدر نے قطر میں مختصر قیام کے دوران طیارے میں قطر کے امیر تمیم بن حمد الثانی اور وزیراعظم سے ملاقات کی اور کہا کہانہوں نے کہا کہ غزہ امن معاہدہ برقرار رہے گا اور مشرق وسطی میں امن قائم ہو گا، قطر امریکہ کا عظیم اتحادی ہے، ضرورت پڑنے پر قطر غزہ کی پٹی میں امن فوج بھیجے گا۔قبل ازیں سوشل میڈیا پر جاری اپنے پیغام میں امریکی صدر کا کہنا تھا کہ اگلے 48 گھنٹے انتہائی اہم ہیں، حماس اسرائیلی یرغمالیوں کی لاشیں واپس کرے، حماس کو ہر حال میں ہتھیار ڈالنے ہوں گے، اسرائیلی یرغمالیوں میں 2 امریکی قیدی بھی شامل ہیں، مشرق وسطیٰ میں ہمیشہ کیلئے امن چاہتے ہیں۔امریکی صدر ڈونلڈ ٹرمپ نے اپنے ایشیائی دورے کا آغاز کر دیا، جس میں وہ ملائیشیا، جاپان اور جنوبی کوریا کا دورہ کریں گے۔یہ صدر ٹرمپ کے دوسرے دورِ صدارت میں تیسرا غیر ملکی دورہ ہے۔ اس سے قبل وہ مشرقِ وسطیٰ اور برطانیہ کا دورہ کر چکے ہیں۔نیا دورہ مشرقی اور جنوب مشرقی ایشیا میں امریکی سفارتی تعلقات کو مزید وسعت دینے کے مقصد سے کیا جا رہا ہے، جس کے دوران علاقائی سلامتی، تجارتی تعاون اور اسٹریٹجک شراکت داری کے موضوعات پر اہم ملاقاتیں متوقع ہیں۔