سائفر کیس: عمران خان آج فرد جرم عائد ہونے کا امکان

سائفر کیس میں آج بانی پی ٹی آئی اورشاہ محمودقریشی پر فرد جرم عائد ہونے کا امکان ہے۔سائفر کیس کی سماعت آج اڈیالہ جیل میں ہوگی، جج ابو الحسنات محمد ذوالقرنین سماعت کریں گے۔بانی پی ٹی آئی اور شاہ محمود قریشی کو عدالت پیش کیا جائے گا، اور آج ان دونوں ملزمان پر فرد جرم عائد ہونے کا امکان ہےگزشتہ سماعت میں سابق وزیراعظم عمران خان اور سابق وزیر خارجہ شاہ محمود قریشی پر فرد جرم عائد نہیں ہوسکی تھی۔آفیشل سیکریٹ ایکٹ کے تحت قائم کی گئی خصوصی عدالت کے جج ابو الحسنات ذوالقرنین نے سفارتی سائفر گمشدگی کیس کی سماعت اڈیالہ جیل میں کی۔ عمران خان اور شاہ محمود قریشی کو کمرہ عدالت میں پیش کیا گیا۔سماعت کے لیے ایف آئی اے اسپیشل پراسیکیوٹر شاہ خاور، ذوالفقارعباس نقوی جب کہ عمران خان کے وکیل بیرسٹر سلمان صفدراور شاہ محمود کے وکیل بیرسٹر تیمور ملک کمرہ عدالت میں موجود تھے۔ جب کہ عمران خان کی اہلیہ بشریٰ بی بی، ان کی ہمشیرائیں اور شاہ محمود کے اہل خانہ بھی اڈیالہ جیل پہنچے تھے۔خصوصی عدالت نے وکلاء صفائی کی جانب سے دائر 6 متفرق درخواستیں نمٹا کر کیس کی سماعت ایک دن کے لئے ملتوی کردی۔ اور جج ابوالحسنات ذوالقرنین نے ریمارکس دیئے کہ جیل میں اوپن ٹرائل پر میڈیا کے معاملے پر جیل انتظامیہ سے بات کروں گا۔